స‌మాంత‌ర వ్య‌వ‌స్థ‌తో శాసిస్తున్న మ్యాథ్ డైరెక్ట‌ర్!

రంగుల మాయా ప్ర‌పంచంలో దీపం ఉండ‌గానే చ‌క్క‌దిద్దుకోవాలి. ఏదో ఒక శాఖ‌లో రాణించాక ఇత‌ర శాఖ‌ల్లోనూ స‌త్తా చాటేందుకు ప్ర‌ణాళిక‌ల్ని విస్త‌రిస్తూనే ఉండాలి.  ఇప్పుడున్న స్టార్ డైరెక్ట‌ర్లు అంతా ఇలానే ఆలోచిస్తున్నారు.

ఒక్క సుకుమార్ వ‌ర‌కూ తీసుకున్నా.. అత‌డు ద‌ర్శ‌క ర‌చ‌యిత‌గా.. నిర్మాతగా త‌న‌దైన ముద్ర వేస్తున్నారు. ఓవైపు అగ్ర హీరోల‌తో భారీ చిత్రాల‌కు ద‌ర్శ‌కుడిగా కొన‌సాగుతూనే.. త‌న శిష్యుల‌ను ద‌ర్శ‌కులుగా ప‌రిచ‌యం చేస్తూ సినిమాలు నిర్మిస్తున్నారు. కొత్త‌వారిని ద‌ర్శ‌కులుగా మ‌లిచి ర‌చ‌నా స‌హ‌కారం అందించి ప్రాజెక్ట్ స‌మీక్ష‌కుడిగా స‌మ‌న్వ‌య‌క‌ర్త‌గా ఉంటూ ఒక స‌రికొత్త స‌మాంత‌ర వ్య‌వ‌స్థ‌ను న‌డిపించేస్తున్నారు. ఇంకా చెప్పాలంటే త‌నే ఒక కొత్త ప్ర‌పంచాన్ని సృష్టించుకుని శాసిస్తున్నార‌ని చెప్పాలి.

సుకుమార్ శిష్యుల్లో సూర్య ప్ర‌తాప్ కుమారి 21 ఎఫ్ చిత్రంతో బ్లాక్ బ‌స్ట‌ర్ కొట్టి త‌ర్వాత కెరీర్ ని సాగిస్తున్నారు. ప్ర‌స్తుతం సూర్య ప్ర‌తాప్ ద‌ర్శ‌క‌త్వంలో జీఏ2 -సుక్కూ రైటింగ్స్ బ్యాన‌ర్ల‌లో 18పేజెస్ అనే సినిమా తెర‌కెక్కుతోంది. అలాగే ఉప్పెన లాంటి బ్లాక్ బ‌స్ట‌ర్ తో డెబ్యూగా ప‌రిచ‌య‌మైన బుచ్చిబాబు స‌నా పేరు టాలీవుడ్ లో మార్మోగుతోంది. త‌దుప‌రి అత‌డి కోసం స్టార్ హీరోలే వెయిట్ చేస్తున్నార‌న్న టాక్ వినిపిస్తోంది.  బుచ్చిబాబుకి రానా ఆఫ‌ర్ ఇచ్చార‌ని కూడా క‌థ‌నాలొచ్చాయి. మునుముందు సుకుమార్ కాంపౌండ్ నుంచి మ‌రింత‌మంది ద‌ర్శ‌కులు తెరపైకి రాబోతున్నార‌న్న స‌మాచారం కూడా ఉంది.

ఒక సృజ‌కుడు ఇలా ఆలోచించ‌డం త‌ప్పు కాదు. ప్ర‌తిభ‌కు అవ‌కాశాలిస్తూ త‌న‌ని తాను నిల‌బెట్టుకుంటూ ప‌దిమంది శిష్యుల‌ను నిల‌బెట్టేందుకు ప్ర‌య‌త్నించ‌డం ప్ర‌శంసించ‌ద‌‌గిన‌ది. ఈ త‌ర‌హా వ్య‌వ‌స్థ‌లో ఇత‌రుల‌తో పోలిస్తే సుక్కూ ది బెస్ట్ అని కూడా ప్రూవ్ అవుతోంది.