అశ్వినీద‌త్ కు మోహ‌న్ బాబు షాక్?

టాలీవుడ్ లో మోస్ట అవెయిటెడ్ ప్రాజెక్ట్ గా `మ‌హాన‌టి` సావిత్రి బ‌యోపిక్ తెర‌కెక్కుతోన్న సంగ‌తి తెలిసిందే. ఈ చిత్రంలో మోహ‌న్ బాబు - దుల్క‌ర్ స‌ల్మాన్ - కీర్తి సురేష్ - స‌మంత లతో పాటు చాలా మంది హేమాహేమీలు న‌టిస్తున్నారు. అయితే, `మ‌హాన‌టి`లో లెజెండ‌రీ న‌టుడు ఎస్వీ రంగారావు పాత్ర లో మోహన్ బాబు న‌టిస్తోన్న సంగ‌తి తెలిసిందే. 'మాయా బజార్' లో 'ఘటోత్కచుడు'గా ఎస్వీఆర్ పాడిన 'వివాహభోజనంబు' పాటను ఈ సినిమాలో చిత్రీక‌రించిన‌ట్లు కూడా వార్త‌లు వ‌చ్చాయి. ఈ సినిమాలో ఇంత‌టి ప్రాధాన్య‌త ఉన్న పాత్రలో న‌టించిన మోహ‌న్ బాబు....నిర్మాత అశ్వినీద‌త్ కు షాకిచ్చార‌ట‌. ఈ సినిమాలో న‌టించినందుకు మోహ‌న్ బాబు ఒక్క పైసా కూడా రెమ్యున్ రేష‌న్ తీసుకోన‌ని అశ్వినీద‌త్ కు తేల్చి చెప్పేశార‌ని ఫిల్మ్ న‌గ‌ర్ టాక్.

ఎస్వీఆర్ పాత్రలో న‌టించిన మోహన్ బాబు అడిగినంత పారితోష‌కం ఇస్తాన‌ని అశ్వినీద‌త్ చెప్పార‌ట‌. దాదాపు రూ. కోటి ఇచ్చేందుకు అశ్వినీద‌త్ సిద్ధ‌ప‌డ్డార‌ట‌. అయితే,ఆ ఆఫ‌ర్ ను మోహ‌న్ బాబు సున్నితంగా తిరస్క‌రించార‌ట‌. మ‌హాన‌టుడు ఎస్వీఆర్ పాత్రలో న‌టించ‌డం త‌న‌కు ద‌క్కిన‌ గౌర‌వంగా భావిస్తాన‌ని, దానికి వెల క‌ట్టలేనని ఆయ‌న అన్నార‌ట‌. అంతేకాకుండా, షూటింగ్ స‌మ‌యంలో మోహ‌న్ బాబు త‌న ఖ‌ర్చుల్ని కూడా తానే భ‌రించారట‌. మోహ‌న్ బాబు ఉదార‌త‌కు అశ్వినీద‌త్ తో పాటు చిత్ర యూనిట్ ఫిదా అయిపోయార‌ని టాక్. లెజెండ‌రీ న‌టుడు ఎస్వీఆర్ మీద ఉన్న గౌర‌వంతో రెమ్యున్ రేష‌న్ తిరస్క‌రించిన మోహ‌న్ బాబు ప‌లువురికి ఆద‌ర్శంగా నిలిచార‌ని ఫిల్మ్ న‌గ‌ర్ వ‌ర్గాలు చర్చించుకుంటున్నాయి.