మురుగదాస్ దిల్ రాజుతో చేతులు కలుపుతాడా?

ఇంతకుముందు సోలోగా సినిమాలు తీసిన దిల్ రాజు.. ఈ మధ్య వేర్వేరు సంస్థల భాగస్వామ్యంతో సినిమాలు నిర్మిస్తున్నాడు. అది కూడా మీడియం రేంజి సినిమాలతోనే బండి నడిపిస్తున్నాడు. దీని వల్ల రిస్క్ తక్కువ, లాభాలు ఎక్కువ అని ఆయన భావిస్తున్నారు. ఇప్పటికే అల్లు అరవింద్, పీవీపీ లాంటి పెద్దోళ్లతో సినిమాలు చేస్తున్న రాజు.. ఇప్పుడు ఓ ప్రముఖ తమిళ దర్శకుడు కమ్ నిర్మాతతో చేతులు కలపబోతున్నాడు. ఆ ప్రముఖుడు మరెవరో కాదు.. మురుగదాస్. తమిళంలో యువ దర్శకుల్ని ప్రోత్సహిస్తూ లో బడ్జెట్ లో మంచి సినిమాలు తీస్తున్న మురుగదాస్.. త్వరలోనే తెలుగులోకి అడుగుపెట్టబోతున్నాడు.

తన శిష్యుడు గోపీచంద్ మలినేని దర్శకత్వంలో దిల్ రాజుతో కలిసి ఓ సినిమా నిర్మించబోతున్నట్లు సమాచారం. మురుగదాస్ దర్శకత్వంలో తెరకెక్కిన తమిళ సినిమా ‘కత్తి’ని  గోపీచంద్ రీమేక్ చేయబోతున్నట్లు కొన్ని రోజులుగా ప్రచారం జరుగుతున్న నేపథ్యంలో మురుగదాస్ పెట్టుబడి పెట్టేది ఆ సినిమాలోనే అన్న ప్రచారం కూడా జరుగుతోంది కానీ.. ఐతే ఇది  వేరే కొత్త కథ అని సమాచారం. ఓ స్టార్ హీరోను నటింపజేయడానికి ప్రయత్నాలు జరుగుతున్నాయట. ఈ సినిమాకు మురుగదాసే కథ అందించే అవకాశాలు కూడా ఉన్నట్లు సమాచారం. ఇది తెలుగు, తమిళ భాషలు రెండింట్లోనూ తెరకెక్కే అవకాశం కూడా ఉంది. ప్ర స్తుతం మురుగదాస్ తమిళ హిట్ మూవీ ‘మౌనగురు’ను హిందీలో సోనాక్షి సిన్హా ప్రధాన పాత్రలో రీమేక్ చేస్తున్నాడు.