మరోసారి మాస్ మహారాజ్ జోడీగా నభా నటేశ్?

నభా నటేశ్ .. తెలుగు తెరపై ఇప్పుడు దూకుడు మీదున్న గ్లామరస్ హీరోయిన్స్ లో ఒకరు. 'నన్ను దోచుకుందువటే' సినిమాతో తెలుగు తెరకి పరిచయమైన ఈ బ్యూటీ, తొలి ప్రయత్నంలోనే విజయాన్ని అందుకుంది. కుర్ర గుండెలను గుత్తాకు  తీసేసుకుంది. సున్నుండలాంటి ఈ అమ్మాయిని చూసిన కుర్రాళ్లు, అన్ని సినిమాలను ఆమెనే చేయాలని అనుకున్నారు. ఏ స్క్రీన్ పెద్దదిగా ఉంటే అక్కడే ఆమె సినిమాలను చూస్తామని మొక్కుకున్నారు. బ్యాచిలర్స్ రాజ్యంలో ఆమెకి గల క్రేజ్ ను బట్టే వరుసగా అవకాశాలు రావడం మొదలుపెట్టాయి.


హీరోయిన్స్ గ్లామర్ ను మాస్ వైపు మళ్లించే పూరి దర్శకత్వంలో 'ఇస్మార్ట్ శంకర్' సినిమాలో ఈ సుందరి ఛాన్స్ కొట్టేసింది. ఆయన ఈ పిల్లకి పొట్టి డ్రెస్ లు వేయించి బీచ్ లో పరిగెత్తించాడు. గుమ్మడిపువ్వులాంటి ఈ అమ్మాయి సొగసులను తెరపై చూసి సొమ్మసిల్లిపడిపోయిన వాళ్లు ఎక్కువ సంఖ్యలోనే ఉన్నారు. ఆ పిల్ల పొర్లిన ఇసుకను కేజీల్లెక్కన కొనుక్కురావడానికి వెళ్లినవాళ్లూ ఉన్నారు. అలాంటి ఈ అమ్మాయి మరోసారి రవితేజ సరసన నాయికగా ఛాన్స్ కొట్టేయనుందనే టాక్ ఫిల్మ్ నగర్లో బలంగా వినిపిస్తోంది.


ప్రస్తుతం రమేశ్ వర్మ దర్శకత్వంలో 'ఖిలాడి' సినిమా చేస్తున్న రవితేజ, తరువాత మూడు ప్రాజెక్టులను లైన్లో  పెట్టేశాడు. ఒక సినిమాకి త్రినాథరావు నక్కిన ... మరో సినిమాకి మారుతి .. ఇంకో సినిమాకి కొత్త కుర్రాడు దర్శకత్వం వహించనున్నారు. ఈ మూడు ప్రాజెక్టులలో ఒక సినిమాలో కథనాయికగా నభా నటేశ్ పేరు వినిపిస్తోంది.  ఆల్రెడీ ఇంతకుముందు రవితేజతో నభా 'డిస్కోరాజా' చేసింది. అప్పుడు ముగ్గురు కథనాయికల్లో ఒకరిగా మెరిసిన ఈ పిల్ల, ఈ సారి సోలో హీరోయిన్ గా చెలరేగిపోనుందన్న మాట.