శివ పాటకు నాగ్‌ - ప్రభాస్‌ - ఎన్టీఆర్‌ రచ్చ డాన్స్‌

ఎస్‌ ఎస్‌ రాజమౌళి - రమాల తనయుడు కార్తికేయ వివాహం పూజతో తాజాగా అంగరంగ వైభవంగా జైపూర్‌ కోటలో జరిగిన విషయం తెల్సిందే. పెళ్లితో పాటు సంగీత్‌ కార్యక్రమంలో టాలీవుడ్‌ స్టార్స్‌ పెద్ద ఎత్తున పాల్గొన్నారు. తెలుగు స్టార్స్‌ రామ్‌ చరణ్‌ - ఎన్టీఆర్‌ - ప్రభాస్‌ - నాగార్జున - రానా ఇంకా పలువురు పాల్గొన్నారు. సంగీత్‌ కార్యక్రమంలో స్టార్స్‌ వేసిన డాన్స్‌ వీడియోలు సోషల్‌ మీడియాలో పెద్ద ఎత్తున వైరల్‌ అయ్యాయి. ఇప్పటికే రాజమౌళి - ఎన్టీఆర్‌ - రామ్‌ చరణ్‌ - రానాలు వేసిన డాన్స్‌ లు వైరల్‌ అవ్వగా - తాజాగా నాగార్జున వేసిన డాన్స్‌ సోషల్‌ మీడియాలో హల్‌ చల్‌ చేస్తోంది.

కార్తికేయ, పూజల పెళ్లి సంగీత్‌ కార్యక్రమంలో నాగార్జున ఎంట్రీ ఇవ్వగానే శివలోని బాటనీ క్లాస్‌ ఉంది... అంటూ పాటను ప్లే చేయడం జరిగింది. దాంతో అంతా కూడా నాగార్జున చుట్టు చేరి స్టెప్పులు వేయించారు. నాగార్జునతో పాటు ప్రభాస్‌ మరియు ఎన్టీఆర్‌ లు కూడా స్టెప్పులు వేశారు. అక్కడ ఉన్న అఖిల్‌ కూడా వీరితో స్టెప్పులు వేసి అక్కడున్న వారిని ఉత్సాహ పర్చారు. నాగార్జున స్టెప్పులతో అక్కడున్న వారందరిలో కూడా జోష్‌ వచ్చి మరింత రచ్చగా డాన్స్‌ వేశారు.

కార్తికేయ ‘బాహుబలి’ సినిమా ద్వారా ప్రేక్షకులకు పరిచయం అయ్యాడు. ఆ చిత్రం సెకండ్‌ యూనిట్‌ కు డైరెక్షన్‌ చేయడంతో పాటు, ప్రొడక్షన్‌ వర్క్‌ అన్ని కూడా తానే చూసుకున్నాడు. ఇక బాహుబలి ప్రమోషన్‌ విషయాల్లో కార్తికేయ కీలకంగా వ్యవహరించాడు. కార్తికేయ ప్రస్తుతం పూర్తి స్థాయి నిర్మాతగా మారడంతో పాటు, పలు వ్యాపారాల్లో తనదైన ముద్ర వేసేందుకు ప్రయత్నాలు చేస్తున్నాడు. ఇక కార్తికేయ పెళ్లి చేసుకున్న పూజ సింగర్‌ గా ఇప్పటికే మంచి గుర్తింపును దక్కించుకుంది.