నారా రోహిత్ వెర్సస్ నారా రోహిత్?

ఒక హీరో నటించిన రెండు సినిమాలు ఒకే రోజు విడుదల కావడం అన్నది అరుదైన విషయం. గతంలో నందమూరి బాలకృష్ణ నటించిన నిప్పురవ్వ.. బంగారు బుల్లోడు సినిమాలు ఒకే రోజున విడుదలయ్యాయి. ఇక రెండేళ్ల కిందట నాని సినిమాలు ఎవడే సుబ్రమణ్యం.. జెండాపై కపిరాజు కూడా ఇలాగే ఒకే తేదీకి ప్రేక్షకుల్ని పలకరించాయి. ఇప్పుడు ఈ కోవలోనే ఒకే రోజు నారా రోహిత్ సినిమాలు రెండు ఒకే తేదీన విడుదలకు సిద్ధమవుతున్నాయి. నిజంగా ఆ రెండు సినిమాలు ఒకే రోజు వస్తాయో లేదో చెప్పలేం కానీ.. ప్రస్తుతానికైతే నారా బాబు సినిమాలు రెండు రిలీజ్ కోసం ఒకే తేదీని ఎంచుకున్నాయి.రోహిత్ సోలో హీరోగా నటిస్తున్న ‘కథలో రాజకుమారి’ సినిమాను జూన్ 30న విడుదల చేయబోతున్నట్లు ఇంతకుముందే ప్రకటించిన సంగతి తెలిసిందే. ఆ చిత్రానికి రోహిత్ కూడా ఒక నిర్మాత అన్న సంగతి తెలిసిందే. ఐతే తాజాగా రోహిత్ నటిస్తున్న మల్టీస్టారర్ మూవీ ‘శమంతకమణి’ని కూడా జూన్ 30నే రిలీజ్ చేయబోతున్నట్లు చిత్ర నిర్మాత ‘భవ్య’ ఆనంద్ ప్రసాద్ ప్రకటించడం విశేషం. రోహిత్ కు తెలిసే ‘శమంతకమణి’ రిలీజ్ డేట్ ఫైనలైజ్ చేశారో లేదో తెలియదు. ‘కథలో రాజకుమారి’తో పాటు ‘శమంతకమణి’ని కూడా రోహిత్ చాలా ప్రత్యేకంగా భావిస్తున్నాడు. ఇందులో తన మనసుకు బాగా నచ్చిన పాత్ర చేస్తున్నట్లు చెప్పాడు.

మరి అతను తనకు ప్రత్యేకంగా భావించిన రెండు సినిమాలూ ఒకే రోజు రావడానికి అంగీకరించి ఉంటాడా అన్నది డౌట్. రోహిత్ ఇందులో నలుగురు హీరోల్లో ఒకడు కాబట్టి క్లాష్ అంటూ ఏమీ ఉండదని భావించి ‘కథలో రాజకుమారి’తో పాటే రిలీజ్ చేయాలనుకున్నారో ఏంటో తెలియదు. మరి ఇప్పటి ప్రకటనకు కట్టుబడి ‘కథలో రాజకుమారి’కి పోటీగా ‘శమంతకమణి’ని అదే రోజు తీసుకొస్తారా.. లేక మధ్యలో అండర్ స్టాండింగ్ తో డేటు మారుస్తారా అన్నది చూడాలి.

Like Us on Facebook : https://www.facebook.com/Tupakidotcom/