నిఖిల్ కొత్త సినిమా రిలీజ్ డేట్

సెకండ్ ఇన్నింగ్స్ లో మాంచి ఊపులో సాగుతున్న యువ కథానాయకుడు నిఖిల్ కు ‘శంకరాభరణం’ పెద్ద బ్రేక్ వేసింది. దీంతో తన తర్వాతి సినిమా విషయంలో చాలా జాగ్రత్తగా అడుగులేశాడు నిఖిల్. సినిమా ఒప్పుకోవడానికే చాలా టైం తీసుకున్నాడు. చివరికి ‘టైగర్’ ఫేమ్ వీఐ ఆనంద్ దర్శకత్వంలో సినిమా మొదలుపెట్టాడు. అదే ‘ఎక్కడికి పోతావు చిన్నవాడా’. నిఖిల్-ఆనంద్ కాంబినేషన్ లో సినిమా అన్నపుడు పెద్దగా ఆసక్తి కలగలేదు కానీ.. ఈ సినిమా ఫస్ట్ లుక్ పోస్టర్ చూశాక అభిప్రాయం మారింది. తమిళంలో తన తొలి సినిమా ‘అప్పూచి గ్రామం’ తరహాలోనే ఈసారి ఆనంద్ ఓ సైన్స్ ఫిక్షన్ కథతో వెరైటీ ప్రయోగమే చేస్తున్నట్లుగా కనిపించింది పోస్టర్ చూస్తే.

ఇప్పటికే టాకీ పార్ట్ పూర్తి చేసుకున్న ఈ సినిమాకు విడుదల తేదీని ఖరారు చేశారు. నవంబరు 11న ‘ఎక్కడికి పోతావు చిన్నవాడా’ ప్రేక్షకుల ముందుకొస్తుంది. నిజానికి ఈ నెలలోనే సినిమా విడుదల కావాల్సి ఉన్నా.. బడ్జెట్ సమస్యల వల్ల టాకీ పార్ట్ కొంచెం ఆలస్యమైంది. ఐతే ఔట్ పుట్ చాలా బాగా వచ్చిందని.. సినిమా కచ్చితంగా సక్సెస్ అవుతుందని నిఖిల్ అండ్ కో కాన్ఫిడెంట్ గా ఉంది. మేఘన ఆర్ట్స్ అనే కొత్త సంస్థ నిర్మిస్తున్న ఈ చిత్రంలో నిఖిల్ సరసన హెబ్బా పటేల్.. తమిళ హీరోయిన్ నందిత నటిస్తున్నారు. త్వరలోనే ఫస్ట్ టీజర్ రిలీజ్ చేసి.. నెలాఖరులో ఆడియో వేడుక చేయబోతున్నారు. మరి ఈ సినిమాతో నిఖిల్ మళ్లీ సక్సెస్ ట్రాక్ ఎక్కుతాడేమో చూడాలి.

Like Us on Facebook : https://www.facebook.com/Tupakidotcom/