ఆ రెంటిలో నితిన్‌ ఫస్ట్‌ సెలక్షన్‌ ఏది?

యంగ్‌ హీరో నితిన్‌ వరుస పరాజయాలతో కాస్త గ్యాప్‌ తీసుకున్నాడు. భారీ అంచనాలు పెట్టుకుని నటించిన ‘శ్రీనివాస కళ్యాణం’ చిత్రం నిరాశ పర్చడంతో తదుపరి చిత్రం విషయంలో దీర్ఘాలోచలో ఉన్నట్లుగా సమాచారం అందుతోంది. శ్రీనివాస కళ్యాణం తర్వాత నితిన్‌ మొదట కమిట్‌ అయిన చిత్రం ‘భీష్మ’. ఈ చిత్రానికి ‘ఛలో’ ఫేం వెంకట్‌ కుడుముల దర్శకత్వం వహించబోతున్నాడు. ఇప్పటికే ఈ చిత్రం ప్రీ ప్రొడక్షన్‌ వర్క్‌ పూర్తి అయ్యాయి. డిసెంబర్‌ లో సినిమాను పట్టాలెక్కించేందుకు ఏర్పాట్లు చేస్తున్నట్లుగా సమాచారం అందుతోంది. ఈ చిత్రాన్ని సితార ఎంటర్‌ టైన్‌ మెంట్స్‌ బ్యానర్‌ లో నిర్మిస్తున్నారు. నితిన్‌ ఈ చిత్రంతో పాటు మరో సినిమాకు కూడా గ్రీన్‌ సిగ్నల్‌ ఇచ్చాడు.

గీతా ఆర్ట్స్‌ 2 బ్యానర్‌ లో నితిన్‌ ఒక చిత్రం చేయబోతున్నాడు. అందుకు సంబంధించిన స్క్రిప్ట్‌ వర్క్‌ జరుగుతోంది. కుమారి 21ఎఫ్‌ చిత్ర దర్శకుడు ప్రతాప్‌ దర్శకత్వంలో నితిన్‌ తో బన్నీ వాసు సినిమాను నిర్మించేందుకు సన్నాహాలు చేస్తున్నాడు. త్వరలోనే ఈ చిత్రం కూడా పట్టాలెక్కే అవకాశం ఉంది అంటూ సినీ వర్గాల ద్వారా సమాచారం అందుతోంది. ‘భీష్మ’ కంటే కూడా ప్రతాప్‌ దర్శకత్వంలో సినిమాపై నితిన్‌ ఆసక్తిని కనబర్చుతున్నాడని, ముందుగా గీతా ఆర్ట్స్‌ 2 కే డేట్లు కేటాయించే అవకాశం ఉందని అంటున్నారు. అయితే ఇప్పటికే సిద్దంగా ఉన్న భీష్మ చిత్రం పరిస్థితి ఏంటీ అనేది కొందరి ప్రశ్న. ప్రస్తుతం ఉన్న పరిస్థితుల్లో రెండు సినిమాలను సమాంతరంగా చేసే అవకాశాలు లేవు. దాంతో నితిన్‌ ముందు ఒకటి చేసి ఆ తర్వాత మరో సినిమాను చేయాల్సి ఉంటుంది. మరి నితిన్‌ ముందు ఏ చిత్రాన్ని ఎంపిక చేసుకుంటాడో అనే విషయమై ఆసక్తికర చర్చ జరుగుతోంది.