నితిన్ కోసం ఇంట్రెస్టింగ్ రీమేక్

హ్యాట్రిక్ హిట్ల తర్వాత ‘చిన్నదాన నీకోసం -  కొరియర్ బాయ్ కళ్యాణ్' రిజల్ట్ తేడా కొట్టడంతో దాదాపు ఏడాది గ్యాప్ తీసుకున్నాడు నితిన్. గ్యాప్ అయితే వచ్చింది కానీ.. తర్వాత త్రివిక్రమ్ లాంటి టాప్ డైరెక్టర్ తో సినిమా చేసే ఛాన్స్ పట్టేశాడు. వీళ్లిద్దరి కాంబినేషన్ లో ‘అ..ఆ’ మూవీ శరవేగంగా షూటింగ్ జరుపుకుంటోంది. దీని తర్వాత కూడా రెండు మూడు సినిమాలు లైన్ లో ఉన్నాయి నితిన్ కోసం. మల్లిడి వేణు అనే కొత్త దర్శకుడితో సినిమా ‘అ..ఆ’ ముగియగానే మొదలవుతుంది. లిరిసిస్ట్ టర్న్డ్ డైరెక్టర్ కృష్ణ చైతన్యతో కూడా ఓ సినిమా చేయాల్సి ఉంది.

ఇవి రెండూ ఇలా ఉండగానే ఇప్పుడో తమిళ రీమేక్ నితిన్ తలుపు తట్టింది. ఈ మధ్యే విడుదలైన ‘ఈట్టి’ అనే తమిళ హిట్ మూవీని తెలుగులో నితిన్ తో రీమేక్ చేయడానికి అక్కడి నిర్మాత - దర్శకుడు ప్రయత్నం చేస్తున్నారు. రవి అరసు అనే యువ దర్శకుడు రూపొందించిన ‘ఈట్టి’ గత శుక్రవారం రిలీజై సూపర్ హిట్ టాక్ తెచ్చుకుంది. నేషనల్ లెవెల్ అథ్లెట్ అయిన కథానాయకుడు ఓ దొంగ నోట్ల కేసులో చిక్కుకుని దాన్నుంచి ఎలా బయటపడ్డాడనే కథాంశంతో తెరకెక్కిన థ్రిల్లర్ ఇది.

అధర్వ హీరోగా నటించాడు. శ్రీదవ్య హీరోయిన్. ఈ సినిమా విడుదలైన రెండు మూడు రోజులకే రెండు మూడు భాషల నుంచి రీమేక్ ఆఫర్లు వచ్చాయి. హిందీలో షాహిద్ కపూర్ హీరోగా ఈ సినిమా రీమేకయ్యే అవకాశాలున్నాయి. తెలుగులో మాత్రం నితిన్ హీరోగా తమిళ దర్శక నిర్మాతలే సినిమా తీయడానికి కమిట్ మెంట్ తీసుకున్నట్లు సమాచారం. నితిన్ ఇంతకుమందు అమ్మ రాజశేఖర్ దర్శకత్వంలో చేసిన ‘టక్కరి’ కూడా తమిళ రీమేకే.