'పాగల్' ని ప్రేమలో కట్టిపడేసిన టాలెంటెడ్ బ్యూటీ..!

యువ హీరో 'మాస్ కా దాస్' విశ్వక్ సేన్ నటిస్తున్న లేటెస్ట్ మూవీ "పాగల్". న‌రేష్ కొప్పల్లి ఈ చిత్రానికి దర్శకత్వం వహిస్తున్నాడు. దిల్ రాజు సమర్పణలో శ్రీ వెంకటేశ్వర క్రియేషన్స్ - లక్కీ మీడియా బ్యానర్స్ పై బెక్కం వేణుగోపాల్ ఈ చిత్రాన్ని నిర్మిస్తున్నారు. ఇప్పటికే విడుదలైన ఫస్ట్ లుక్ మరియు టీజర్ మంచి స్పందన తెచ్చుకున్నాయి. విభిన్నమైన సినిమాలు చేస్తూ యూత్ ఆడియన్స్ లో మంచి ఫాలోయింగ్ ఏర్పరచుకున్న విశ్వక్.. ఈసారి ప్రేమలో ప్రతి ఒక్కడు పాగల్ అంటూ మ్యాజికల్ లవ్ స్టోరీతో వస్తున్నాడు. ఈ చిత్రంలో సిమ్రాన్ చౌదరి - మేఘ లేఖ హీరోయిన్లుగా నటిస్తున్నట్లు మేకర్స్ వెల్లడించారు.

ఈ క్రమంలో తాజాగా నివేదా పేతురాజ్ మరో హీరోయిన్‌ గా నటిస్తున్నట్లు మేకర్స్ వెల్లడించారు. నివేదా ఇందులో తీరా అనే పాత్రలో నటిస్తున్న క్యారెక్టర్ రివీల్ పోస్టర్ లో తెలిపారు. ఈ రొమాంటిక్ పోస్టర్ లో విశ్వక్ చేతులు వెనక్కి కట్టివేయబడి ఉన్నాయి.. నివేతా అతన్ని గట్టిగా హగ్ చేసుకుని కనిపిస్తోంది. 'పాగల్' చిత్రానికి రథన్ సంగీతం సమకూరుస్తున్నాడు. మణికందన్ సినిమాటోగ్రాఫర్ గా వ్యవహరిస్తుండగా.. గ్యారీ ఎడిటింగ్ వర్క్ చేస్తున్నాడు. ఈ చిత్రంలో  - రాహుల్ రామకృష్ణ - మురళీ శర్మ ఇతర పాత్రల్లో కనిపిస్తున్నారు. ముందుగా ఈ చిత్రాన్ని ఏప్రిల్ 30న విడుదల చేయడానికి ప్లాన్ చేశారు. అయితే ఇప్పుడు 'పాగల్' ని సమ్మర్ కానుకగా మే 1న వరల్డ్ వైడ్ గా రిలీజ్ చేస్తున్నట్లు మేకర్స్ అధికారికంగా ప్రకటించారు.