‘గీత గోవిందం’ బ్లాక్ బస్టర్ విజయాన్నందుకున్నాడు దర్శకుడు పరశురామ్. ఇంతకుముందు ‘సోలో’.. ‘శ్రీరస్తు శుభమస్తు’ లాంటి విజయాలున్నప్పటికీ వాటికి ‘గీత గోవిందం’ సాధించిన సక్సెస్ కు అసలు పోలికే లేదు. కెరీర్లో ఇప్పటిదాకా పరశురామ్ తీసిన సినిమాలన్నీ ఒకెత్తయితే.. ‘గీత గోవిందం’ మరో ఎత్తు అని చెప్పాలి. ఈ సినిమాతో అతడి రేంజే మారిపోయిందన్నది స్పష్టం. ఈసారి అతను పెద్ద బడ్జెట్లో భారీ సినిమా ఒకటి తీసే అవకాశాలున్నట్లుగా గుసగుసలు వినిపిస్తున్నాయి. పరశురామ్ కు పెద్ద పెద్ద ఆఫర్లు వస్తున్నట్లు చెబుతున్నారు. ఐతే ఇలాంటి విజయాన్నందుకున్నాక ఛాన్సులు పెరగడం సహజమే అంటూ నవ్వేసిన పరశురామ్.. తాను తర్వాత చేయబోయే సినిమా గురించి క్లారిటీ ఇచ్చాడు.
ముందు చెప్పినట్లే ‘గీతా ఆర్ట్స్’ బేనర్లోనే తన తర్వాతి సినిమా కూడా ఉంటుందని పరశురామ్ స్పష్టం చేశాడు. మనిషికి.. దేవుడికి మధ్య నడిచే ఓ కథతో ఈ సినిమా చేయబోతున్నట్లు చెప్పాడు. అలాగని ఇదేమీ ‘గోపాల గోపాల’ తరహాలో ఉండదన్నాడు. తాను చేయబోయేది పూర్తి భిన్నమైన సినిమా అని.. అది ఆద్యంతం వినోదాత్మకంగా ఉంటుందని.. ఈ కథకు తగ్గట్లు మంచి క్యారెక్టర్లు కుదిరాయని.. ప్రస్తుతం స్క్రిప్ట్ వర్క్ జరుగుతోందని.. వచ్చే ఏడాది సినిమా మొదలవుతుందని పరశురామ్ వెల్లడించాడు. ‘గీతా ఆర్ట్స్’తో పాటు ‘మైత్రీ మూవీ మేకర్స్’కు కూడా తాను కమిట్మెంట్ ఇచ్చానని.. తర్వాతి సినిమా వాళ్లతోనే ఉంటుందని అతనన్నాడు. ‘గీత గోవిందం’ ఎంత పెద్ద విజయం సాధించినప్పటికీ.. తాను పెద్ద దర్శకుడైపోయినట్లు భావించడం లేదని.. ఈ విజయాన్ని నిలబెట్టుకునే సినిమా తీయడం తన ముందున్న సవాల్ అని అతనన్నాడు.