చిరు వస్తాడు.. మరి పవన్?

కెరీర్ ఆరంభంలో ముకుంద.. కంచె లాంటి సినిమాలతో మంచి పేరే సంపాదించాడు వరుణ్ తేజ్. కానీ ‘లోఫర్’ అతడిని పెద్ద దెబ్బ కొట్టింది. తొలి రెండు సినిమాలు కమర్షియల్ గా అంత మంచి ఫలితాన్నివ్వకపోయినా.. పేరైనా తెచ్చాయి. కానీ ‘లోఫర్’తో పేరూ పోయింది. కమర్షియల్ సక్సెస్ కూడా రాలేదు. దీంతో ఇప్పుడతడి ఆశలన్నీ ‘మిస్టర్’ మీదే ఉన్నాయి. హిట్టు కోసం చాలా కసితో ఉన్న శ్రీను వైట్ల తనతో పాటు వరుణ్ కూ విజయాన్నందిస్తాడని ఆశతో ఉంది మెగా ఫ్యామిలీ. సమ్మర్లో మంచి టైమింగ్ చూసుకుని సినిమాను రిలీజ్ చేస్తున్న చిత్ర యూనిట్.. రిలీజ్ లోపు కొంచెం అగ్రెసివ్ గా ప్రమోషన్లు చేయాలని భావిస్తోంది.

ముందు మార్చి 30న ఆడియో వేడుక చేస్తామని.. చిరంజీవి ముఖ్య అతిథిగా వస్తాడని అన్నారు. కానీ తర్వాత ప్లాన్ మారింది. ఆడియోను డైరెక్టుగా మార్కెట్లోకి రిలీజ్ చేసేసి.. మెగా ఫ్యామిలీకి అలవాటైన రీతిలో ఏప్రిల్ 6న ప్రి రిలీజ్ ఈవెంట్ చేయాలని ఫిక్సయ్యారు. ఈ వేడుకకు మెగాస్టార్ వస్తాడట. ఐతే తన అన్నయ్యతో పాటు తమ్ముడిని కూడా రప్పించి ‘మిస్టర్’ను ప్రమోట్ చేయించాలని నాగబాబు ప్రయత్నిస్తున్నాడట. ఈ మధ్య పవన్ గురించి చాలా పాజిటివ్ గా మాట్లాడుతూ.. రాజకీయంగా కూడా అతడిని బలపరుస్తున్నాడు నాగబాబు. కొడుకు కోసం తమ్ముడిని ఎలాగైనా రప్పించాలని.. ఓ చిన్న ఈవెంట్ చేయాలని నాగబాబు భావిస్తున్నాడట. ఐతే తన సినిమాల్నే ప్రమోట్ చేసుకోని పవన్.. వరుణ్ కోసం వస్తాడా అన్నది డౌటు. కానీ నాగబాబు మాత్రం అందుకోసం గట్టి ప్రయత్నమే చేస్తున్నాడట.

Like Us on Facebook : https://www.facebook.com/Tupakidotcom/