‘కాటమరాయుడు’ కరెక్టుగానే ఉన్నాడా?

పవన్ కళ్యాణ్ లాస్ట్ మూవీ ‘సర్దార్ గబ్బర్ సింగ్’ విషయంలో విడుదలకు ముందు ఎంత హడావుడి అయిందో గుర్తుండే ఉంటుంది. విడుదలకు మూడు రోజుల ముందు కూడా ఫైనల్ మిక్సింగ్ పనులు జరుగుతూనే ఉన్నాయి. రిలీజ్ టైం చాలా దగ్గర పడుతుండగా పాటలు తీసుకొచ్చారు. డబ్బింగ్ కూడా చాలా లేటుగా చేశారు. దీంతో సినిమా అనుకున్న సమయానికి రిలీజవుతుందా కాదా అని టెన్షన్ అనుభవించారందరూ. చివరికి ఎలాగోలా అనుకున్న తేదీకే సినిమా వచ్చేసింది. మరిప్పుడు ‘కాటమరాయుడు’ విషయంలో ఏం జరుగుతుందా అని ఉత్కంఠగా ఎదురు చూస్తున్నారు. ఎందుకంటే ఈ సినిమా విషయంలోనూ చివరి వరకు హడావుడి తప్పేట్లు లేదు.

ప్రస్తుతం పవన్ అయితే ఫారిన్లో పాటలేసుకుంటున్నాడు. విడుదలకు సరిగ్గా ఇంకో రెండు వారాలు టైం ఉండగా.. ఇంకా పాటల హడావుడిలో ఉండటం కొంచెం టెన్షన్ పెట్టే వ్యవహారమే. ఆ పాటలు పూర్తి చేసుకుని రావాలి. ఫైనల్ మిక్సింగ్ అవ్వాలి. ఇంకా ప్యాచ్ వర్క్.. డబ్బింగ్ పనులు ఏమైనా మిగిలి ఉంటే కానివ్వాలి. అంతా పర్ఫెక్టుగా కానిచ్చి సినిమాను మార్చి 24న రిలీజ్ చేయాలి. ఈసారైనా ‘సర్దార్..’ తరహాలో గడబిడ లేకుండా సాఫీగా పని పూర్తి చేసి.. పవన్ ప్రశాంతంగా సినిమాను రిలీజ్ చేస్తాడో లేదో అని డిస్కషన్ నడుస్తోంది ప్రస్తుతం ఇండస్ట్రీలో. సినిమా వారం ఆలస్యంగా వచ్చినా పర్వాలేదని.. ‘సర్దార్’ విషయంలో జరిగిన తప్పులు మాత్రం పునరావృతం కాకూడదని కోరుకుంటున్నారు అభిమానులు కూడా. ‘కాటమరాయుడు’ టీం కూడా అదే ఆలోచనతోనే ఉందో ఏమో.. మార్చి 24న సినిమా పక్కా అని ఇంకా ప్రకటన ఏదీ ఇవ్వలేదు. ఏదైనా తేడా వస్తే 29వ తేదీని కూడా ఒక ఆప్షన్ గా పెట్టుకున్నట్లు తెలుస్తోంది.

Like Us on Facebook : https://www.facebook.com/Tupakidotcom/