ప్రభాస్ హస్త సాముద్రికం చెబుతాడట

కొంతమంది నమ్మొచ్చు.. కొంతమంది నమ్మకపోవచ్చు. చేతిరేఖలను బట్టి జాతకాలు చెప్పేవాళ్లకు లోటేం లేదు. యంగ్ రెబల్ స్టార్ ప్రభాస్ కూడా ఇదే పని చేయబోతున్నాడు. బాహుబలి హిట్ తర్వాత ప్రభాస్ ఏం చేయబోతున్నాడా దేశం మొత్తం అతడివైపే చూస్తోంది. యు.వి. క్రియేషన్స్ బ్యానర్ పై యాక్షన్ ఎంటర్ టైనర్ గా సాహో చేసేందుకు ప్రస్తుతం రెడీ అయిపోయాడు. రన్ రాజా రన్ ఫేం సుజిత్ ఈ సినిమా డైరెక్ట్ చేయబోతున్నాడు. ఈ సంవత్సరం ఆఖరు కల్లా ఈ సినిమా షూటింగ్ పూర్తి చేయాలనే ఆలోచనలో యూనిట్ ఉంది.

సాహో తర్వాత ప్రభాస్ గోపీకృష్ణ ఫిలిమ్స్ బ్యానర్ లో సినిమా చేయబోతున్నాడనేది టాక్. గోపీకృష్ణ ఫిలిమ్స్ అనేది ప్రభాస్ పెదనాన్న కృష్ణం రాజు సొంత ప్రొడక్షన్ హౌస్. సాహో తర్వాత కూడా యు.వి. క్రియేషన్స్ లోనే సినిమా చేయాలని మొదట అనుకున్నప్పటికీ చివరకు సొంత బ్యానర్ లో సినిమా చేయడానికి మొగ్గు చూపాడట. జిల్ డైరెక్టర్ రాధా కృష్ణ ఈ మూవీని డైరెక్ట్ చేయనున్నాడు. ఇందులో ప్రభాస్ జ్యోతిష్యుడి పాత్రలో కనిపించనున్నాడు. అందులోనూ హస్త సాముద్రికం చెప్పడంలో సిద్దహస్తుడిగా కనిపిస్తాడని సన్నిహితుల మాట. రొమాంటిక్ కామెడీగా ఈ సినిమా తెరకెక్కనుంది.

బాహుబలి తర్వాత ప్రభాస్ తో సినిమా చేయాలని చాలామంది నిర్మాతలు ఉవ్విళ్లూరుతున్నారు. కానీ యంగ్ రెబల్ స్టార్ ముందు సొంత బ్యానర్ లో సినిమా చేయనున్నందున వాళ్లంతా ఇంకొంతకాలం వెయిట్ చెయ్యక తప్పదు. అంటే దాదాపు 2019 వరకు వేరే నిర్మాతలకు కమిట్ మెంట్ లభించే అవకాశం తక్కువే.

Like Us on Facebook : https://www.facebook.com/Tupakidotcom/