మనోజ్ కోసమే అంటున్న ప్రకాష్ రాజ్

మంచు మనోజ్ దశాబ్దం నుంచి ఇండస్ట్రీలో ఉంటున్నాడు. ఐతే గత ఏడాది వరకు మనోజ్ తో ఒక్క సినిమా కూడా చేయలేదు ప్రకాష్ రాజ్. రామ్ గోపాల్ వర్మ తొలిసారి వీళ్లిద్దరి కాంబినేషన్ ను తెరమీదికి తెచ్చాడు. ‘అటాక్’ సినిమాలో వీళ్లిద్దరూ కలిసి నటించారు. ఆ వెంటనే మనోజ్ చేసిన ‘శౌర్య’లోనూ ప్రకాష్ రాజ్ కీలక పాత్ర చేశాడు. ఐతే దశరథ్ దర్శకత్వంలో ఇప్పటికే ‘మిస్టర్ పర్ఫెక్ట్’లో చేసినప్పటికీ ‘శౌర్య’లో మాత్రం మనోజ్ కోసమే నటించానని చెప్పాడు ప్రకాష్ రాజ్. ‘శౌర్య’ సక్సెస్ మీట్ లో ఆయన మాట్లాడుతూ.. ‘‘శౌర్య మనోజ్ కెరీర్ ను మలుపు తిప్పే సినిమా. ఈ సినిమాలో నేను కీలక పాత్ర చేయడానికి మనోజే కారణం. అతడి కోసమే నటించా. మనోజ్ మంచి నటుడు. అతడిలోని మరో కోణాన్ని ‘శౌర్య’ చూపించింది’’ అని ప్రకాష్ రాజ్ అన్నాడు.

మనోజ్ మాట్లాడుతూ.. ‘శౌర్య’ లాంటి సినిమా చేసినందుకు గర్వంగా ఉందన్నాడు. ‘‘కొత్తదనాన్ని ప్రేక్షకులు ఆదరిస్తారని నమ్మాం. అదే జరిగింది. ఏ సినిమాకూ రానన్ని కాల్స్ ఈ సినిమాకు అందుకున్నాను. సినిమా చాలా కొత్తగా ఉందంటున్నారు. నా లుక్ - పెర్ఫామెన్స్ గురించి ప్రత్యేకంగా చెబుతున్నారు. ఇప్ప‌టి వ‌ర‌కు నేను చేసిన చిత్రాల్లో ర‌ఫ్ గా క‌నిపించాను. ఇది డిఫ‌రెంట్ మూవీ. అందుక‌ని నా లుక్ కూడా కొత్త‌గా ఉండాల‌ని ఇలా ట్రై చేసాం. ఈ లుక్ కోసం 8 కేజీలు పెరిగాను. మేం చేసిన ఈ కొత్త ప్రయత్నాన్ని ఆదరించిన ప్రేక్షకులకు ధన్యవాదాలు’’ అని మనోజ్ చెప్పాడు. తన తర్వాతి సినిమాను రమేష్ పుప్పాల నిర్మాణంలో చేయాల్సి ఉందని.. ప్రస్తుతం కథా చర్చలు జరుగుతున్నాయని.. ఏప్రిల్లో కొత్త సినిమా మొదలవుతుందని మనోజ్ చెప్పాడు. ఇందులో కూడా తాను సరికొత్త లుక్ లో కనిపిస్తానన్నాడు.