బాహుబ‌లిలో ప్రియ‌మ‌ణి?

బాహుబలి సీక్వెల్‌ లో కొత్త పాత్ర‌లు క‌నిపించ‌బోతున్నాయా? ఆ పాత్ర‌ల కోసం తార‌ల్ని ఎంపిక చేసుకొనే ప‌నిలో రాజ‌మౌళి ఉన్నాడా?  ఉండొచ్చేమో అనే సందేహాలే వ్య‌క్త‌మ‌వుతున్నాయి. ఎందుకంటే బాహుబ‌లి సెట్లో ఇటీవ‌ల కొత్త తార‌ల హ‌డావుడి క‌నిపిస్తోంది. రామోజీ ఫిల్మ్‌ సిటీలో ఈరోజు `బాహుబ‌లి ది క‌న్‌ క్లూజ‌న్`  క్లైమాక్స్ స‌న్నివేశాలు మొద‌ల‌య్యాయి. వేలాది మంది జూనియ‌ర్ ఆర్టిస్టులు - ప్ర‌ధాన తారాగ‌ణం పాల్గొన‌గా కీల‌క స‌న్నివేశాలు తెర‌కెక్కించారు. తొలి రోజు వ‌చ్చిన  ఫైన‌ల్ ఔట్‌ పుట్ చూసుకొని రాజ‌మౌళి సంతోషం వ్య‌క్తం చేశాడు. నెల‌ల త‌ర‌బ‌డి స‌న్న‌ద్ధం కావ‌డం ప‌నికొచ్చింద‌ని చెప్పుకొచ్చాడు.

అయితే తొలి రోజు సెట్లో క‌థానాయిక ప్రియ‌మ‌ణి ద‌ర్శ‌న‌మివ్వ‌డం హాట్ టాపిక్‌ గా మారింది. ఆమెని ఏదైనా పాత్ర కోసం రాజ‌మౌళి పిలిపించాడా? లేదంటే ఆమెనే ఊరికే  బాహుబ‌లి షూటింగ్ చూసేందుకని వ‌చ్చిందా? అన్న‌ది తెలియాల్సి వుంది. బాహుబ‌లి షూటింగ్ చూడ‌టం మాత్రం  చాలా బాగుంద‌ని, నాకు అనుమతినిచ్చినందుకు ధ‌న్య‌వాదాలు అని ట్వీట్ చేసింది ప్రియ‌మ‌ణి. ఆమె రాజ‌మౌళి క‌థానాయికే. ఇదివ‌ర‌కు రాజ‌మౌళి తీసిన య‌మ‌దొంగ సినిమాలో ఆమెనే హీరోయిన్. అప్ప‌ట్నుంచి రాజ‌మౌళి కుటుంబంతో ప్రియ‌మ‌ణికి మంచి ర్యాపో ఉంది. ఆ ర్యాపోతోనే షూటింగ్ చూడ్డానికి వ‌చ్చిందా లేదంటే రాజ‌మౌళి ఆమెకోసం ఏదైనా పాత్ర‌ని సృష్టించాడో కొన్ని రోజులు ఆగితే స్ప‌ష్ట‌త వ‌స్తుంది. అయితే కొన్నాళ్ల క్రిత‌మే మ‌రో స్టార్ హీరోయిన్ కూడా బాహుబ‌లి సెట్లో క‌నిపించింద‌ట‌.