మల్లప్ప.. ది సిక్స్ ప్యాక్ పృథ్వీ

సునీల్ అనగానే బొద్దుగా ఉండే అవతారం కళ్ల ముందు కదలాడేది ఒకప్పుడు. కానీ హీరోగా మారాక ‘పూలరంగడు’ సినిమాకు సిక్స్ ప్యాక్ లుక్ లోకి మారిపోయి పెద్ద షాకే ఇచ్చాడు సునీల్. ఆ తర్వాత అదే లుక్ లో కంటిన్యూ అవుతున్నాడతను. ఐతే సునీల్ వయసుకు అతను సిక్స్ ప్యాక్ చేయడం మరీ ఆశ్చర్యమేమీ కాదు. కానీ 50 ప్లస్ లో ఉన్న కమెడియన్ పృథ్వీ సిక్స్ ప్యాక్ చేయడం అన్నది ఆశ్చర్యకరమైన విషయమే. ఆ మధ్య ఓ తమిళ సినిమా కోసం కండలు పెంచుతున్నట్లు చెప్పాడు కానీ.. అదేమైందో తెలియదు. ఐతే తాజాగా తాను ప్రధాన పాత్రలో తెరకెక్కబోతున్న ‘మల్లప్ప’ అనే సినిమా కోసం సిక్స్ ప్యాక్ చేయనున్నట్లు పృథ్వీ వెల్లడించాడు.

పృథ్వీ ప్రస్తుతం ‘మీలో ఎవరు కోటీశ్వరుడు’ అనే సినిమా చేశాడు. అందులో అతను హీరో తరహా పాత్ర చేశాడు. ‘మల్లప్ప’లో మాత్రం అతనే హీరో అట. ఈ పాత్ర కోసం కొన్నాళ్లుగా జిమ్ కు వెళ్లి కష్టపడుతున్నానని.. సిక్స్ ప్యాక్ చేస్తున్నానని వెల్లడించాడు పృథ్వీ. ఇక ‘మీలో ఎవరు కోటీశ్వరుడు’ సినిమాలో తన పాత్రకు అంత ప్రాధాన్యం ఇవ్వడం పట్ల పృథ్వీ ఉబ్బితబ్బిబ్బయ్యాడు. ‘లౌక్యం’ సినిమా ముందు వరకు పోస్టర్లలో తన ఫొటో చిన్న చిన్న ముక్కలుగా కనిపించేదని.. ‘లౌక్యం’ నుంచి తనకు ప్రాధాన్యం ఇస్తున్నారని.. ‘మీలో ఎవరు కోటీశ్వరుడు’ సినిమాకు పోస్టర్ నిండా తన ఫొటోనే చూసుకోవడం తనకు అద్భుతమైన అనుభవమని ఉద్వేగంగా చెప్పాడు పృథ్వీ.


Like Us on Facebook : https://www.facebook.com/Tupakidotcom/