కుర్ర హీరోను శ్రీదేవితో పోల్చాడబ్బా

ఎవరైనా వీడు ఎన్టీఆర్ అంత గొప్ప నటుడు అవుతాడు చిరంజీవి అంత టాప్ హీరో అవుతాడు అని ఆశీర్వదిస్తారు కాని.. శ్రీదేవితో ఒక కుర్ర హీరోను కంపేర్ చేస్తారేంటండీ?? ఆ మాటకొస్తే పూరి జగన్ మాత్రం కాస్త వేరబ్బా. ఎందుకంటే మనోడు ఇప్పుడు తన కొత్త హీరోను సింపుల్ గా చెట్టెక్కించేశాడు. అయితే పొగడ్తలతో మునగ చెట్టెక్కించాడా లేకపోతే నిజంగానే ఏదైనా మహావృక్షం ఎక్కించాడా అనే విషయం సినిమా రిలీజ్ అయ్యాక తెలుస్తుందిలే.

నిన్న జరిగిన ''రోగ్'' ట్రైలర్ రిలీజ్ కార్యక్రమంలో కొత్త హీరో ఇషాన్ ను తదుపరి సూపర్ స్టార్ అంటూ వర్ణించేశాడు పూరి జగన్. ''అప్పట్లో రాఘవేంద్రరావు గారు శ్రీదేవిని పరిచయం చేసినప్పుడు.. ఆమె సూపర్ స్టార్ అవుతుందని అనుకునే ఉంటారు. అలాగే ఆమె సూపర్ స్టార్ అయినప్పుడు ఆయనే ఎక్కువగా ఆనందించి ఉంటారు కూడా. అలాగే ఇషాన్ కూడా పెద్ద స్టార్ అవుతాడు. మనోడు ఖచ్చితంగా ఒక పెద్ద హీరో అయిపోతాడు'' అంటూ సెలవిచ్చాడు పూరి జగన్. ఏకంగా కొత్త కుర్రాడిని శ్రీదేవితో పోల్చడం ఇప్పుడు టాక్ ఆఫ్‌ ది టౌన్ అయ్యింది.

నిజానికి రోగ్ ట్రైలర్ చూస్తే.. ఇషాన్ దగ్గర హ్యాండ్సమ్ లుక్స్ అయితే ఉన్నాయి కాని.. హీరోగా నిలబడతాడా లేదా అనే విషయం మాత్రం అప్పుడే చెప్పలేం. ఆ విషయం సినిమా రిలీజ్ తరువాతనే తెలుస్తుంది.

Like Us on Facebook : https://www.facebook.com/Tupakidotcom/