పూరి జగన్.. గ్రౌండ్ రెడీ చేస్తున్నాడు

ఏడాదికి కనీసం రెండు సినిమాలు ఊదేస్తుంటాడు స్పీడ్ డైరెక్టర్ పూరి జగన్నాథ్. టాలీవుడ్ లో పూరి స్పీడును అందుకోవడం మరే డైరెక్టరుకీ సాధ్యం కాని పని. ఈ ఏడాది ఇప్పటికే టెంపర్ - జ్యోతిలక్ష్మి సినిమాలు వచ్చాయి పూరి నుంచి. ‘లోఫర్’ కూడా ఈ ఏడాదే విడుదలవుతుంది. దీని తర్వాత కూడా వరుసగా సినిమాలు చేయడానికి రంగం సిద్ధం చేసుకున్నాడు పూరి. తెలుగులోనే అతడికి మూణ్నాలుగు కమిట్మెంట్ లు ఉన్నాయి. ఐతే పూరి మాత్రం ఓ కన్నడ హీరోను ఇంట్రడ్యూజ్ చేయడానికి రెడీ అవుతున్నాడు. ‘మహాత్మ’ సినిమాను నిర్మించిన కన్నడ నిర్మాత మనోహర్ కొడుకు ఇషాంత్ ను హీరోగా పరిచయం చేయడానికి పూరి ఒప్పుకున్న సంగతి తెలిసిందే. అదే పూరి తర్వాతి సినిమా.

ఓవైపు ‘లోఫర్’ పోస్ట్ ప్రొడక్షన్ పని చేస్తూనే ఈ సినిమాకు గ్రౌండ్ ప్రిపేర్ చేస్తున్నాడు పూరి. ప్రొడక్షన్ డిజైన్ - నటీనటుల ఎంపిక అంతా కానిచ్చేసి డిసెంబర్ లోనే ఈ సినిమాను మొదలుపెట్టి.. మూడు నెలల్లో పూర్తి చేయడానికి పూరి ప్రణాళిక సిద్ధం చేస్తున్నాడు. ఈ సినిమాకు పూరి ఓ బాలీవుడ్ భామను హీరోయిన్ గా తీసుకోబోతున్నాడట. ఆమె మరెవరో కాదు... అమైరా దస్తూర్. హిందీలో మిస్టర్ ఎక్స్ - తమిళంలో అనేగన్ సినిమాలు చేసిన అమైరాను.. తెలుగులోకి తీసుకురావడానికి ఇప్పటికే ప్రయత్నాలు జరుగుతున్నాయి. చరణ్ - ఎన్టీఆర్ ల సరసన ఈ అమ్మాయి హీరోయిన్ గా చేయొచ్చని ప్రచారం జరుగుతుండగా.. పూరి ఆమెను తన సినిమాకు ఓకే చేసేశాడు.