'రాధే శ్యామ్' కు టాటా చెప్పి.. 'బీస్ట్' కోసం చెన్నై చెక్కేసింది..!

యంగ్ రెబల్ స్టార్ ప్రభాస్ - పూజా హెగ్డే జంటగా నటిస్తున్న వింటేజ్ లవ్ స్టోరీ ''రాధే శ్యామ్''. రాధాకృష్ణ కుమార్ ఈ పాన్ ఇండియా చిత్రానికి దర్శకత్వం వహిస్తున్నారు. కరోనా సెకండ్ వేవ్ నేపథ్యంలో నిలిచిపోయిన ఈ సినిమా షూటింగ్ ను ఇటీవలే తిరిగి ప్రారంభించారు. హైదరాబాద్ లో జరుగుతున్న ఈ షెడ్యూల్ లో పూజాహెగ్డే కు సంబంధించిన సన్నివేశాల చిత్రీకరణ పూర్తైనట్లు తెలుస్తోంది. అంతేకాదు ఆమె విజయ్ తో కలిసి నటిస్తున్న 'బీస్ట్' షూటింగ్ లో ఈరోజు జాయిన్ అయినట్లు సమాచారం. చెన్నైలో జరుగుతున్న ఈ షెడ్యూల్ లో జానీ మాస్టర్ కొరియోగ్రఫీలో విజయ్ - పూజా లపై సాంగ్ ను చిత్రీకరించనున్నారు.

ఇకపోతే 'రాధే శ్యామ్' చిత్రంలో విక్రమాదిత్య గా ప్రభాస్.. ప్రేరణ పాత్రలో పూజా నటిస్తున్నారు. 1960ల నాటి ఇటలీ బ్యాక్ డ్రాప్ లో ఈ సినిమా కథ నడుస్తుంది. అయితే ఈ సినిమా క్లైమాక్స్ గురించి సోషల్ మీడియాలో ఆసక్తికరమైన చర్చ జరుగుతోంది. అదేంటంటే క్లైమాక్స్ లో పూజా పాత్ర చనిపోతుందని.. సినిమా విషాదంగా ముగుస్తుందని.. క్లైమాక్స్ లో ప్రభాస్ యాక్టింగ్ కంటతడి పెట్టిస్తుందని అంటున్నారు. ఇందులో నిజమెంతో తెలియాలంటే సినిమా రిలీజ్ అయ్యే వరకు ఆగాల్సిందే. కాగా, 'రాధే శ్యామ్' చిత్రాన్ని భారీ బడ్జెట్ తో అత్యున్నత సాంకేతిక పరిజ్ఞానంతో రూపొందిస్తున్నారు. గోపీకృష్ణా మూవీస్‌ - యూవీ క్రియేషన్స్‌ - టీ సిరీస్ సంస్థలు కలిసి ఈ చిత్రాన్ని నిర్మిస్తున్నారు. త్వరలోనే ఈ సినిమా విడుదల తేదీపై క్లారిటీ రానుంది.