వారితో సినిమా చేస్తానంటున్న రాజ‌మౌళి!

సూప‌ర్ స్టార్ ర‌జ‌నీకాంత్  తో సినిమా చేస్తారా అని  నన్నే కాదు  సౌత్ ఇండియా ఫిలిం ఇండ‌స్ర్టీలో ఏ ద‌ర్శ‌ర‌కుడినైనా అడ‌గండి. వారి నుంచి  వ‌చ్చే స‌మాధానం ఒక‌టే య‌స్ అని, కాబ‌ట్టి నా స‌మాధానం కూడా అదే అంటున్నారు ద‌ర్శ‌క ధీరుడు రాజ‌మౌళి. ఇటీవ‌ల చెన్నైలో జ‌రిగిన ఒక కాలేజ్ ఫంక్ష‌న్ కి రాజ‌మౌళి ముఖ్య అతిథిగా హాజ‌ర‌య్యారు. ఈ కార్య‌క్ర‌మంలో పాల్గొన్న అక్క‌డి స్టూడెంట్స్ త‌లైవా తో సినిమా చేస్తారా? అని అడిగిన ప్ర‌శ్న‌కు  పై విధంగా స్పందించాడు  రాజ‌మౌళి.

ఇంకా ఆయ‌న చెబుతూ..త‌లైవాతో ఎటువంటి సినిమా చేస్తానో, ఏ పాత్ర‌లో చూపిస్తానో క్లారిటీ మాత్రం లేదు.కానీ ర‌జ‌నీకాంత్ తో సినిమా తీస్తే మాత్రం ప‌దిరోజుల పాటు సినిమా థియేట‌ర్ లో విజిల్స్ త‌ప్ప మాట‌లు విన‌ప‌డ‌వు, అలాంటి సినిమా చేస్తానంటూ చెప్పుకొచ్చారు. బాహుబ‌లి సినిమా షూటింగ్ కి హాజ‌రైన ర‌జ‌నీకాంత్  ఇండియాలోనే గొప్ప ద‌ర్శ‌కుడుగా  రాజమౌళి పేరు తెచ్చుకుంటాడంటూ ప్ర‌శంసించిన విష‌యం తెలిసిందే. దీన్నిబ‌ట్టి రాజ‌మౌళి ఎప్పుడు వెళ్లినా ర‌జ‌నీ సినిమా చేయ‌డానికి సిధ్ద‌మే అన‌డంలో అతిశ‌యోక్తి లేదు. అయితే ఇప్ప‌టికే వీరిద్ద‌రి క‌ల‌యిక‌లో వ‌చ్చే సినిమా ఎలా ఉంటుందో అని త‌మ త‌మ ఊహాశ‌క్తికి ప‌రీక్ష‌లు పెట్టుకుంటున్నారు సినీ అభిమానులు.

ఇదిలా ఉంటే మోహ‌న్ లాల్ తో రాజ‌మౌళి గ‌రుడ సినిమా చేయ‌నున్నాడంటూ ఆ మ‌ధ్య వార్త‌లు హల్ చ‌ల్ చేశాయి. దీని గురించి ఓ స్టూడెంట్ అడ‌గ్గా... నా మ‌న‌సులో గరుడ కి సంబంధించిన కాన్సెప్ట్ మాత్ర‌మే ఉంది. ఇంకా క‌థ పూర్తిగా త‌యార‌వ‌లేదు.  భార‌త‌దేశంలోనే ప్ర‌తిభావంతులైన న‌టుల్లో ఆయ‌న కూడా ఒక‌రు. అవ‌కాశం వ‌స్తే క‌చ్చితంగా సినిమా చేస్తానంటూ స‌మాధానం ఇచ్చారు రాజ‌మౌళి.