బాల‌య్య‌తో మ‌ల్టీస్టారర్ పై యాంగ్రీహీరో

ప‌రిశ్ర‌మ‌లో అగ్ర హీరోలు క‌లిసి మ‌ల్టీస్టార‌ర్ లో న‌టిస్తే చూడాల‌న్న కోరిక అభిమానుల‌కు ఉంటుంది. చిరంజీవి- ప‌వ‌న్ క‌ల్యాణ్ మ‌ల్టీస్టార‌ర్ .. చిరంజీవి- బాల‌కృష్ణ మల్టీస్టార‌ర్ .. చిరంజీవి - రాజ‌శేఖ‌ర్ మ‌ల్టీస్టార‌ర్ .. లేదూ అగ్ర హీరోలు ఇద్ద‌రు ముగ్గురు క‌లిసి న‌టిస్తే చూడాల‌ని ర‌క‌ర‌కాల కోరికలు ఫ్యాన్స్ వ్య‌క్త‌ప‌రుస్తుంటారు. ఆ క్ర‌మంలోనే ఆ త‌ర‌హా గాసిప్పులు ప‌లుమార్లు సోష‌ల్ మీడియాలో ప్ర‌చారం అయ్యాయి. ముఖ్యంగా చిరంజీవి సినిమాలో రాజ‌శేఖ‌ర్ విల‌న్ గా న‌టిస్తార‌ని అప్ప‌ట్లో ప్ర‌చార‌మైంది. చిరు న‌టించిన ల్యాండ్ మార్క్ మూవీ `ఖైదీనంబ‌ర్ 150`లో యాంగ్రీ హీరో రాజ‌శేఖ‌ర్ విల‌న్ గా ఎంపిక‌య్యార‌ని అప్ప‌ట్లో ప్ర‌చార‌మైంది. రాజ‌శేఖ‌ర్ క‌థ విన్నారు.. కానీ పాత్ర న‌చ్చ‌క చేయ‌న‌ని చెప్పేశార‌ని అప్ప‌ట్లో తామ‌ర‌తంప‌ర‌గా వార్త‌లొచ్చాయి. ఇటీవ‌లే బాల‌య్య బాబు సినిమాలోనూ రాజ‌శేఖ‌ర్ ఓ కీల‌క‌మైన పాత్ర పోషించేందుకు అంగీక‌రించార‌ని నెటిజ‌నులు సోష‌ల్ మీడియా వేదిక‌గా ప్ర‌చారం చేశారు.

ఇదే విష‌యంపై నేడు హైద‌రాబాద్ లోని రాజ‌శేఖ‌ర్ స్వ‌గృహంలో జ‌రిగిన ఇంట‌ర్వ్యూలో మీడియా ప్ర‌శ్నించింది. బాలకృష్ణ సినిమాలో మీరు న‌టిస్తున్నార‌ట క‌దా? అన్న ప్రశ్న‌కు.. రాజ‌శేఖ‌ర్ త‌న‌దైన స్మైలీ ఫేస్ తో స‌మాధానం ఇచ్చారు. ``ఇలాంటివి చాలా వినిపిస్తున్నాయి. చిరంజీవి గారు- నేను క‌లిసి చేస్తామని కొందరు రాశారు. ఈ పుకార్లు ఎవరు ప్ర‌చారం చేస్తున్నారో తెలుసుకోవడానికి ఇన్వెస్టిగేషన్ మొద‌లు పెడ‌తా`` అంటూ న‌వ్వేశారు.

విల‌న్ పాత్ర‌లు చేయ‌డానికి సిద్ధంగానే ఉన్నారా? అన్న ప్ర‌శ్న‌కు.. విల‌నీకి నేను రెడీ (స్మైల్).. అయితే నేను విల‌న్ అయితే త‌ట్టుకోలేరు. అందుకని భయపడుతున్నారేమో!! అంటూ స‌ర‌దాగా వ్యాఖ్యానించారు. `ధృవ`లో అరవింద్ స్వామి విల‌నీ త‌ర‌హా అయితే చేస్తా. రెగ్యులర్ విలన్ రోల్స్ చేయన‌ని అన్నారు. అరవింద సమేత వీరరాఘవ - శ్రీమంతుడు చిత్రాల్లో జగపతిబాబు చేసిన పాత్రలు కూడా నచ్చాయి. అలాంటి అవ‌కాశాలు వ‌స్తే న‌టిస్తాన‌ని రాజ‌శేఖ‌ర్ అన్నారు. యాంగ్రీ హీరో చెప్పిన దానిని బ‌ట్టి ఇదివ‌ర‌కూ ద‌ర్శ‌కులు త‌న‌కు వినిపించిన విల‌న్ పాత్ర‌లేవీ త‌న‌ని సంతృప్తి ప‌ర‌చ‌లేద‌ని అర్థం చేసుకోవాలి.