రాజమౌళి కోసం రజినీ వస్తున్నాడా?

ఎప్పుడెప్పుడా అని ఎదురు చూస్తున్న ‘బాహుబలి: ది కంక్లూజన్’ ఆడియో వేడుక ఈ రోజే (ఆదివారం) జరగబోతోంది. హైదరాబాద్ శివార్లలోని రామోజీ ఫిలిం సిటీ మెయిన్ గేట్ వద్ద ఈ వేడుక నిర్వహించబోతున్నారు. ‘బాహుబలి’ని హిందీలో అందిస్తున్న కరణ్ జోహార్ ఈ వేడుకకు ముఖ్య అతిథిగా రాబోతున్నారు. టాలీవుడ్ నుంచి ప్రత్యేక అతిథులేమీ ఉండకపోవచ్చని తెలుస్తోంది. బాహుబలి టీం సభ్యులే ఈ వేడుకను నడిపించబోతున్నారు. దీని తర్వాత తమిళం.. హిందీల్లోనూ బాహుబలి ఆడియో వేడుకల్ని వేర్వేరుగా నిర్వహించడానికి సన్నాహాలు జరుగుతున్నాయి. ఏప్రిల్ 9న చెన్నైలో తమిళ ఆడియో వేడుక చేస్తారని సమాచారం.

ఈ వేడుకకు సూపర్ స్టార్ రజినీకాంత్ ముఖ్య అతిథిగా హాజరవుతారని తెలుస్తోంది. రాజమౌళి స్వయంగా రజినీకి ఫోన్ చేసి ఈ వేడుకకు రావాల్సిందిగా ఆహ్వానించగా.. ఆయన ఒప్పుకున్నట్లు సమాచారం. రజినీ ఈ వేడుకకు వస్తే దానికొచ్చే క్రేజే వేరుగా ఉంటుంది. ‘బాహుబలి’కి పోటీగా శంకర్ తెరకెక్కిస్తున్న ‘2.0’లో హీరోగా నటిస్తున్న రజినీ.. ఈ వేడుకకు రావడానికి అంగీకరించడం విశేషం. ఆయనతో పాటు మరిందరు కోలీవుడ్ ప్రముఖులు ఈ వేడుకలో పాల్గొంటారట. ఇలా పెద్ద స్థాయిలో ‘బాహుబలి-2’ ఆడియో వేడుక చేస్తే ఈ చిత్రాన్ని తమిళ ప్రేక్షకులు మరింతగా ఓన్ చేసుకునే అవకాశముంది. తమిళ ఆడియో వేడుక అయ్యాక ముంబయిలో హిందీ ఆడియో ఫంక్షన్ చేస్తారు. కేరళలోనూ ప్రి రిలీజ్ ఈవెంట్ ఒకటి చేయాలన్న ప్లాన్లో ఉంది బాహుబలి టీం.

Like Us on Facebook : https://www.facebook.com/Tupakidotcom/