మొత్తానికి రామ్ చరణ్ సాధించేశాడు

మొత్తానికి రామ్ చరణ్ సాధించేశాడు. మిలియన్ డాలర్ కలను ఎట్టకేలకు నెరవేర్చుకున్నాడు. చరణ్ కొత్త సినిమా ‘ధృవ’ అనుకున్నట్లుగానే అమెరికాలో మిలియన్ డాలర్ క్లబ్బులో అడుగుపెట్టింది. కంటెంట్ ఉన్న సినిమా కావడం.. ప్రమోషన్ కూడా బాగా చేయడంతో ‘ధృవ’ ఫస్ట్ వీకెండ్లోనే మిలియన్ క్లబ్బుకు చేరువగా వచ్చింది. మంగళవారం నాడు ఈ మ్యాజిక్ మార్కును దాటేసి.. స్టడీ కలెక్షన్లతో సాగుతోంది. ఈ వీకెండ్లో పెద్ద సినిమాలేమీ లేకపోవడంతో ‘ధృవ’ ఇంకొన్ని లక్షల డాలర్లు కొల్లగొట్టే అవకాశముంది. 1.5 మిలియన్ మార్కు సాధ్యం కాకపోవచ్చు కానీ.. ఫుల్ రన్లో 1.3 మిలియన్ డాలర్ల వరకు వసూలు చేస్తుందని అంచనా.

ఈ ఏడాది అమెరికాలో టాలీవుడ్‌ కు ‘ధృవ’ తొమ్మిదో మిలియన్ డాలర్ మూవీ కావడం విశేషం. ఒక ఏడాదిలో అత్యధిక మిలియన్ డాలర్ మూవీలు రావడం అంటే ఇదే. త్రివిక్రమ్ మూవీ ‘అఆ’ ఈ ఏడాది అమెరికాలో బిగ్గెస్ట్ హిట్ గా నిలవడం విశేషం. ఆ చిత్రం 2.5 మిలియన్ డాలర్ల దాకా వసూలు చేసింది. ‘నాన్నకు ప్రేమతో’ 2.09 మిలియన్ డాలర్లతో తర్వాతి స్థానంలో నిలిచింది. 2 మిలియన్ క్లబ్బులోకి చేరినవి ఆ రెండే. తర్వాతి స్థానాల్లో వరుసగా జనతా గ్యారేజ్ (1.8 మిలియన్).. ఊపిరి (1.56 మిలియన్).. 24 (1.47 మిలియన్).. పెళ్లిచూపులు (1.19 మిలియన్).. బ్రహ్మోత్సవం (1.15 మిలియన్).. సర్దార్ గబ్బర్ సింగ్ (1.07 మిలియన్) ఉన్నాయి. ‘ధృవ’ది ప్రస్తుతం తొమ్మిదో స్థానం. ఈ చిత్రం ఆరో స్థానానికి చేరుకునే అవకాశాలున్నాయి.


Like Us on Facebook : https://www.facebook.com/Tupakidotcom/