చ‌ర‌ణ్ Vs ర‌ణ‌వీర్.. శంక‌ర్ ముందుగా ఎవ‌రితో..!

టాలీవుడ్ స్టార్ హీరో రామ్ చ‌ర‌ణ్ క‌థానాయ‌కుడిగా సౌత్ స్టార్ డైరెక్ట‌ర్ శంక‌ర్ భారీ పాన్ ఇండియా చిత్రానికి శ్రీ‌కారం చుట్టిన సంగ‌తి తెలిసిందే. కానీ ఇంత‌లోనే మ‌రో స్టార్ హీరో పేరు తెర‌పైకి వ‌చ్చింది. శంక‌ర్ స‌ద‌రు హీరోతో సినిమా కోసం స‌న్నాహ‌కాల్లో ఉన్నార‌న్న‌ది తాజా అప్ డేట్. ఒక‌వేళ ఇదే నిజమైతే చ‌ర‌ణ్ తో సినిమా ఆల‌స్య‌మ‌వుతుందా?

లైకాతో ఘ‌ర్ష‌ణ‌ల అనంత‌రం శంక‌ర్ ఆలోచ‌న చూస్తుంటే అతడు మునుప‌టి కంటే దూకుడు పెంచిన‌ట్టే క‌నిపిస్తోంది. ఇప్పుడు అతడు ప‌ట్టు విడుపు ఉన్న‌వాడిలా క‌నిపిస్తున్నారు. కోలీవుడ్ హీరోలు అక్క‌డి సంస్థ‌ల‌‌తోనే సినిమాలు చేయాల‌న్న ఆలోచ‌న అత‌డిలో క‌నిపించ‌డం లేదు. ఇరుగు పొరుగు హీరోలకు ఇత‌ర నిర్మాత‌ల‌కు క‌మిట‌వుతున్నారు.

ఇంత‌కుముందు టాలీవుడ్ స్టార్ హీరో రామ్ చ‌ర‌ణ్ కి క‌మిటవ్వ‌గా ఆ సినిమాని అధికారికంగా ప్ర‌క‌టించేశారు. అలాగే అటు బాలీవుడ్ లోనూ స్టార్ హీరో రణ్ వీర్ సింగ్ ‌తో సినిమా తీయాలని శంక‌ర్ గ‌ట్టి ప్లాన్ లో ఉన్న‌ట్టుగా గత కొన్ని వారాలుగా ఫిల్మ్ సర్కిల్స్ లో వార్తలు వస్తున్నాయి. అయితే చరణ్ తో సినిమా పూర్త‌య్యాకే ర‌ణ‌వీర్ తో ప్రాజెక్ట్ మొద‌లు పెడ‌తారా? అంటే అవున‌‌ని తెలుస్తోంది.

ఈ చిత్రంలో ర‌ణ‌వీర్ స‌ర‌స‌న కియరా న‌టించ‌నుందిట‌. మ‌రోవైపు ఇది 2005 బ్లాక్ బ‌స్ట‌ర్ అప‌రిచితుడు (అన్నీయ‌న్) కి హిందీ రీమేక్ అన్న ప్ర‌చారం సాగుతోంది. అయితే ర‌ణ‌వీర్ తో సినిమాపై శంక‌ర్ అధికారికంగా వివ‌రాల్ని వెల్ల‌డించాల్సి ఉంటుంది. చ‌ర‌ణ్ తో షెడ్యూళ్ల‌కు సంబంధించిన వివ‌రాలు చెబుతారేమో చూడాలి.