శివగామి.. బాహుబలి ఈసారి అక్క తమ్ముడు

బాహుబలి సినిమాలో ప్రభాస్‌.. రమ్యకృష్ణల మద్య సన్నివేశాలను జక్కన్న అద్బుతంగా చిత్రీకరించి తల్లి కొడుకుల మద్య ప్రేమను కళ్లకు కట్టాడు. ఒక తల్లి తన కొడుకులతో ఎలా ఉండాలో శివగామి పాత్రను చూసి నేర్చుకోవాలి అనుకునేలా ప్రభాస్‌ మరియు రమ్యకృష్ణలు తల్లి కొడుకులుగా నటించారు. బాహుబలి.. శివగామి లు గా నటించిన ప్రభాస్ మరియు రమ్యకృష్ణలు మళ్లీ స్క్రీన్‌ షేర్‌ చేసుకోలేదు. మళ్లీ ఇన్నాళ్లకు వీరిద్దరు కలిసి నటించబోతున్నట్లుగా వార్తలు వస్తున్నాయి. సలార్‌ సినిమా కోసం రమ్యకృష్ణ ను దర్శకుడు ప్రశాంత్ నీల్ కీలక పాత్ర కోసం ఎంపిక చేశాడనే వార్తలు వస్తున్నాయి.

రమ్యకృష్ణ మరియు ప్రభాస్ లు బాహుబలి లో తల్లి కొడుకులుగా కనిపిస్తే సలార్‌ లో మాత్రం అక్క తమ్ముడి గా కనిపించబోతున్నారట. ప్రభాస్ రెండు విభిన్న పాత్రల్లో కనిపించబోతున్నాడని.. అందులో ఒక పాత్రకు రమ్యకృష్ణ అక్క పాత్రను పోషించబోతున్నట్లుగా చెబుతున్నారు. బాహుబలి సినిమా తర్వాత మళ్లీ వీరిద్దరి కాంబోలో సినిమా రాబోతున్న నేపథ్యంలో అంచనాలు భారీగా ఉన్నాయి. ప్రభాస్ మరియు రమ్యకృష్ణలు ఖచ్చితంగా సలార్‌ లో కూడా సోదర సోదరి గా అలరించే అవకాశం ఉందని కొందరు అభిప్రాయం వ్యక్తం చేస్తున్నారు.

బాహుబలి తర్వాత సెకండ్ ఇన్నింగ్స్‌ లో రమ్యకృష్ణ దూకుడు పెంచింది. వరుసగా సినిమాలు చేస్తూ వస్తోంది. టాలీవుడ్‌ మరియు కోలీవుడ్ లో స్టార్‌ హీరోల సినిమాల్లో కీలక పాత్రల్లో నటిస్తూ మెప్పిస్తూ వచ్చిన రమ్యకృష్ణ ప్రస్తుతం లైగర్‌ మరియు రిపబ్లిక్ సినిమాల్లో కీలక పాత్రలో కనిపించబోతున్నట్లుగా ఇప్పటికే అధికారికంగా క్లారిటీ ఇచ్చారు. సలార్‌ సినిమా లో మాత్రం రమ్యకృష్ణ ఉందా లేదా అనే విషయంలో క్లారిటీ రావాల్సి ఉంది.