బాలీవుడ్ లో మూడో చిత్రానికి కమిటైన రష్మిక.. హాలీవుడ్ ఎంట్రీ పై స్పందన..!

టాలీవుడ్ లో అడుగుపెట్టిన కన్నడ బ్యూటీ రష్మిక మందన్నా.. వరుసగా సినిమాలతో స్టార్ హీరోయిన్ గా మారిపోయింది. తన చిరునవ్వుతో తెలుగు ప్రేక్షకుల హృదయాలను గెలుచుకున్న ఈ బ్యూటీ.. కన్నడ తమిళ హిందీ భాషల్లో నటిస్తోంది. ఈ క్రమంలో నేషనల్ క్రష్ గా పిలవబడుతున్న రష్మిక.. తాజాగా ఇన్స్టాగ్రామ్ లైవ్ చిట్ చాట్ లో ఫాలోవర్స్ తో ముచ్చటించింది. ఈ సందర్భంగా 'హాలీవుడ్ సినిమా ఎప్పుడు చేస్తారంటూ' ఓ అభిమాని అడిగాడు. దీనికి ర‌ష్మిక స్పందిస్తూ 'నో కామెంట్స్.. ఇప్ప‌ట్లో ఏమీ చెప్ప‌ను. ఆ స్థాయి వ‌చ్చిన‌ప్పుడు మాట్లాడుకుందాం'' అని సమాధానం చెప్పింది.

అలానే విజ‌య్ దేవ‌ర‌కొండ‌తో మళ్ళీ సినిమా ఎప్పుడు అని అడిగిన ప్ర‌శ్న‌కు.. ''ఆ విషయం విజయ్‌ ని అడగండి. ఎవ‌రైనా ద‌ర్శ‌కుడు మంచి క‌థ రాస్తే మేమిద్దరం కలిసి నటించడానికి రెడీగానే ఉన్నాం'' అని రష్మిక తెలిపింది. ఇటీవల విజయ్ - రష్మిక కలిసి ఓ కమర్షియల్ యాడ్ లో నటించిన సంగతి తెలిసిందే. ఈ సందర్భంగా మరో బాలీవుడ్‌ చిత్రానికి కూడా గ్రీన్‌ సిగ్నల్‌ ఇచ్చినట్లు వెల్లడించింది. అయితే ఈ సినిమాకు సంబంధించిన ఇతర వివరాలు మాత్రం చెప్పలేదు. కోవిడ్ పరిస్థితుల వ‌ల్ల త‌న ఫ్యామిలీని నాలుగైదు నెల‌లుగా మిస్ అవుతున్న‌ట్టు తెలిపారు. కరోనా బారిన ప‌డ‌కుండా అంద‌రూ త‌మ‌ను తాము ర‌క్షించుకోవాల‌ని, వ్యాయామాలు చేయాలని స‌ల‌హా ఇచ్చారు. మేక‌ప్ ఎక్కువ వేసుకోక‌పోవ‌డం వ‌ల్ల త‌న స్కిన్ ఇప్పుడు చాలా ఫ్రెష్‌ గా ఉంద‌ని రష్మిక చెప్పారు.

కాగా, రష్మిక మందన్నా ప్రస్తుతం అల్లు అర్జున్ సరసన 'పుష్ప' అనే పాన్ ఇండియా సినిమాలో నటిస్తోంది. అలానే యువ హీరో శర్వానంద్ తో 'ఆడాళ్లు మీకు జోహార్లు' సినిమా చేస్తోంది. ఇటీవల కోలీవుడ్ లో హీరో కార్తీతో కలిసి 'సుల్తాన్‌' సినిమాతో తమిళ తంబీలను ఆకట్టుకుంది. ఇక హిందీలో సిద్ధార్థ మల్హోత్రాతో కలిసి 'మిషన్‌ మజ్ను' అనే స్పై థ్రిల్లర్‌ లో నటిస్తోంది. ఇది రష్మిక బాలీవుడ్ డెబ్యూ మూవీ. ఇదే క్రమంలో అమితాబ్‌ బచ్చన్‌ తో కలిసి 'గుడ్‌ బై' సినిమా చేస్తోంది. ఈ రెండు సినిమాలు విడుదల కాకముందే మూడో సినిమా అవకాశం అందుకొని ఫుల్ జోష్ లో ఉంది.