మహేష్ ట్వీట్ చేసింది అందుకా?

మహేష్ బాబు వేరే వాళ్ల సినిమాల గురించి ట్విట్టర్లో స్పందించడం అరుదు. అప్పుడప్పుడు తన బావమరిది సుధీర్ బాబు సినిమాకో.. లేదంటే ‘బాహుబలి’ లాంటి స్పెషల్ మూవీస్ కో స్పందిస్తాడు తప్ప వేరే సినిమాల గురించి రెస్పాండవడం అరుదు. ఐతే ఈ మధ్య మహేష్ బాబును ఒక సినిమా టచ్ చేసింది. దాని గురించి చాలా ఉద్వేగంతో ట్వీట్లు పెట్టాడు మహేష్. ఆ సినిమా మరేదో కాదు.. అర్జున్ రెడ్డి. ఈ చిత్రం చూసి ఫిదా అయిపోయిన మహేష్.. దర్శకుడు సందీప్ రెడ్డి.. హీరో విజయ్ తో పాటు అందరి మీదా ప్రశంసలు కురిపించాడు. ఐతే మహేష్ పనిగట్టుకుని ఈ సినిమా చూడటం.. దర్శకుడి అభినందించడం ఊరికే జరిగిపోలేదని తెలుస్తోంది.

మహేష్ బాబుకు సందీప్ రెడ్డితో సినిమా చేసే ఆలోచన ఉన్నట్లు సమాచారం. మహేష్ భార్య నమ్రత ఈ విషయంలో కీలక పాత్ర పోషించినట్లు తెలుస్తోంది. తాజాగా ఒక ఇంటర్వ్యూలో సందీప్ రెడ్డి చెప్పిందాన్ని బట్టి చూస్తే మహేష్ అతడితో సినిమా చేసినా ఆశ్చర్యపోవాల్సిన పని లేదు. త్వరలోనే తాను మహేష్ ను కలవబోతున్నట్లుగా చెప్పాడు సందీప్. ముందుగా నమ్రతతో మాట్లాడానని.. మహేష్ తో మీటింగుకి ప్రిపేర్డ్ గా ఉండమని నమ్రత తనకు చెప్పిందని.. అందుకోసం రెడీ అవుతున్నానని సందీప్ చెప్పాడు. ఐతే మహేష్ బాబుతో ఏ సినిమా చేయాలన్నది ఇంకా పూర్తిగా ఆలోచించుకోలేదని.. ఎవరితో సినిమా చేసినా తనను బలంగా లాగే సినిమానే చేస్తానని సందీప్ స్పష్టం చేశాడు. మరి మహేష్ తో ఫస్ట్ మీటింగ్ లో అతడిని మెప్పించే కథ చెప్పి సినిమాకు ఒప్పిస్తాడా.. చూద్దాం.