పటేల్ సార్ టీజర్.. రెండే రెండు రోజుల్లో

నిన్న ఉదయం బయటికి వచ్చిన ఒక టీజర్ టాక్ ఆఫ్ ద టాలీవుడ్‌గా నిలిచింది. హీరో వేషాల నుంచి విలన్.. క్యారెక్టర్ రోల్స్ లోకి మారిన జగపతిబాబు.. మళ్లీ లీడ్ రోల్‌ లో నటిస్తున్న ఆ సినిమానే ‘పటేల్ సార్’. వాసు పరిమి అనే కొత్త దర్శకుడు ఈ చిత్రంతో తెలుగు తెరకు పరిచయం కాబోతున్నాడు. వారాహి చలనచిత్రం సంస్థ దీన్ని నిర్మిస్తోంది. ముందు టీజర్ లాంచ్ కావడంతో ఈ సినిమా కూడా రెడీ అయిపోయిందని అంతా అనుకున్నారు. కానీ తర్వాత తేలిందేమంటే.. సినిమా ఇంకా మొదలే కాలేదని. ప్రారంభోత్సవం సందర్భంగానేఈ టీజర్ లాంచ్ చేశారని. షూటింగే మొదలవకుండా టీజర్ లాంచ్ చేయడం విడ్డూరమే.

టీజర్ కోసమే ప్రారంభోత్సవానికి ముందు ప్రత్యేకంగా ట్రయల్ షూట్ చేశాడట దర్శకుడు వాసు పరిమి. విశేషం ఏంటంటే.. ఈ టీజర్ ను కేవలం రెండు రోజుల్లోనే అవగొట్టేశాడట అతను. ఈ విషయాన్ని స్వయంగా నిర్మాత సాయి కొర్రపాటినే వెల్లడించాడు. రెండు రోజుల్లో షూట్ పూర్తి చేసి.. అంతే వేగంతో ఎడిట్ చేసి తనకు చూపించాడని.. ఔట్ పుట్ అద్భుతంగా ఉండటంతో ప్రారంభోత్సవం రోజే టీజర్ లాంచ్ చేశామని సాయి తెలిపాడు. దర్శకుడిగా తొలి సినిమా తీయబోతూ.. రెగ్యులర్ షూటింగుకి ముందే ఇలాంటి టీజర్ రెడీ చేయడం అంటే చిన్న విషయం కాదు. విలన్.. క్యారెక్టర్ రోల్స్ లోకి మారాక హీరో వేషాలకు స్వస్తి చెప్పేసిన జగపతి మళ్లీ.. లీడ్ రోల్ చేస్తుండటంతో ‘పటేల్ సార్’పై ఆసక్తి బాగానే ఉంది. పైగా టీజర్ కూడా సినిమాపై అంచనాల్ని పెంచింది. నిజానికి ఈ చిత్రాన్ని కర్ణాటక మాజీ ముఖ్యమంత్రి కుమారస్వామి నిర్మాణంలో చేయాలనుకున్నాడు జగపతి. తాను కూడా అందులో నిర్మాణ భాగస్వామి కావాలనుకున్నాడు. కానీ మధ్యలో ఏం జరిగిందో ఏమో కానీ.. సాయి కొర్రపాటి లైన్లోకి వచ్చాడు.

Like Us on Facebook : https://www.facebook.com/Tupakidotcom/