రౌడీ బేబీ టాలీవుడ్ టాప్ హీరోయిన్ గా మారబోతోందా...?

సాయి పల్లవి.. మలయాళ 'ప్రేమమ్‌' చిత్రంతో వెండితెరకు పరిచయం అయింది. మొదటి సినిమాతోనే క్రేజీ హీరోయిన్ గా మారిపోయింది. సాయి పల్లవి పేరు తెలియన మన తెలుగు సినీ ప్రేక్షకులుండరంటే అతిశయోక్తి కాదు. తెలుగులో శేఖర్ కమ్ముల దర్శకత్వంలో వచ్చిన 'ఫిదా' సినిమాతో అంతలా ప్రేక్షకులను ఫిదా చేసింది మరి. ఆ సినిమాలో తెలంగాణ యాసలో మాట్లాడి మన తెలుగమ్మాయే అనుకునేంత ముచ్చట గొలిపించింది. నిజానికి ఈ సినిమాకంటే ముందే 'ఢీ' షో ద్వారా ఈ అమ్మడు ఇక్కడి జనాలకు పరిచయమే. ఆ తర్వాత నానితో 'ఎంసీఏ'.. శర్వానంద్ సరసన 'పడి పడి లేచే మనసు'.. నాగసౌర్యతో 'కణం' చిత్రాల్లో నటించి అందర్నీ మెప్పించింది. చేసింది తక్కువ సినిమాలే అయినా ఒక రేంజ్ లో క్రేజ్ సంపాదించుకుంది. అందం - అభినయం - అదృష్టం అన్నీ కలబోసిన సాయి పల్లవి సినీ ప్రేక్షకులను మెస్మరైజ్ చేస్తోంది. కెరీర్ స్టార్టింగ్ నుండి కమెర్షియల్ సినిమాలవైపు పరుగులు తీయకుండా వైవిధ్యమైన పాత్రల్లో నటిస్తూ వస్తోంది. తెలుగు మలయాళ తమిళ చిత్రాల్లో బిజీగా ఉంటూ సౌత్‌ లో మోస్ట్ వాంటెడ్ హీరోయిన్‌ స్టార్ స్టేటస్ తెచ్చుకుంది. 'రౌడీ బేబీ' సాంగ్ కి స్టెప్పులేసి సాయి పల్లవి సృష్టించిన సంచలనం అంతా ఇంతా కాదు. ఆమె డ్యాన్సులకు యూట్యూబ్ రికార్డ్స్ బద్దలయ్యాయని చెప్పవచ్చు.

చాప కింద నీరులా మెల్లిగా టాలీవుడ్ నెంబర్ వన్ హీరోయిన్ వైపు దూసుకుపోతున్న సాయి పల్లవికి దీంతో మాస్ ఫాలోయింగ్ కూడా బాగానే వచ్చేసింది. డాన్స్ లో పట్టు ఉండటం వలన సాయి పల్లవిని కింద సెంటర్స్ ఆడియన్స్ కూడా బాగా రిసీవ్ చేసుకుంటున్నారు. ఐతే ఈ బ్యూటిఫుల్ లేడీ కాస్త లౌక్యంగా ఉంటే ఇక టాలీవుడ్ లో తిరుగు ఉండదు అని సినిమా జనాలు అంటున్నారు. ఎందుకంటే ఇలాంటి పాత్రలే చేస్తాను.. ఎక్సపోజింగ్ కి దూరంగా ఉంటాను.. పొట్టి పొట్టి బట్టలు వేసుకోవడం నా వల్ల కాదు.. అంటూ కండీషన్స్ పెట్టుకోకుండా ఉంటే ఈ ముద్దుగుమ్మ ఇప్పటికే స్టార్ హీరోయిన్ అయ్యేదని టాలీవుడ్ వర్గాల అభిప్రాయం. ఈ రూల్స్ వల్లే పెద్ద సినిమా ఆఫర్స్ సాయి పల్లవి దగ్గరికి రావడం లేదనే ఒపీనియన్ అందరిలోనూ ఉంది. మరి ఇప్పటి నుండైనా కొంచెం లౌక్యంగా నడుచుకుంటూ ముందుకెళ్తుందేమో చూడాలి.

ఇకపోతే సాయి పల్లవి ప్రస్తుతం దగ్గుబాటి రానా సరసన 'విరాటపర్వం' సినిమాలో నటిస్తోంది. ఈ చిత్రాన్ని సురేష్ ప్రొడక్షన్స్ సమర్పిస్తుండగా 'నీది నాది ఒకే కథ' ఫేమ్‌ వేణు ఊడుగుల దర్శకత్వం వహిస్తున్నాడు. అంతేకాకుండా అక్కినేని నాగచైతన్య హీరోగా నటిస్తున్న 'లవ్ స్టోరీ' సినిమాలో హీరోయిన్ గా నటిస్తోంది. సెన్సిబుల్ డైరెక్టర్ శేఖర్ కమ్ముల దర్శకత్వంలో తెరకెక్కుతున్న ఈ సినిమాని నారాయణదాస్, కె. నారంగ్ మరియు ఎఫ్.డి.సి చైర్మైన్ రామ్మోహనరావు కలిసి నిర్మిస్తున్నారు. ఇప్పటికే ఈ రెండు సినిమాల నుండి రిలీజైన సాయి పల్లవి లుక్ ఈ సినిమాలపై అంచనాలను పెంచేసాయి. ప్రస్తుతం నటిస్తున్న ఈ రెండు సినిమాలు సూపర్ హిట్స్ గా నిలిస్తే క్రేజీ ఆఫర్స్ అందుకుంటూ.. ఈ బ్యూటీ టాలీవుడ్ లో తన హవా చూపించే అవకాశం ఉందని చెప్పవచ్చు.