'సూపర్ స్టార్'కు నో చెప్పిన ఫిదా బ్యూటీ

ఇండస్ట్రీలో కొంద‌రు హీరోయిన్లు ఎప్పుడెప్పుడు సూపర్ స్టార్ మహేష్ బాబుతో న‌టించే అవ‌కాశం వ‌స్తుందా అని వేచి చూస్తుంటారు. కొంద‌రికి ఆ ఆఫ‌ర్ చాలా త్వ‌ర‌గానే వ‌స్తుంది. స‌మంత‌ - త‌మ‌న్నా - కాజ‌ల్ లాంటి హీరోయిన్ల‌కు ఒక్కో సినిమాతోనే జాత‌కం మారిపోయింది. ఇదివరకే సాయిప‌ల్ల‌వికి కూడా ఇలాంటి ఆఫ‌ర్ వ‌చ్చింద‌ని తెలుస్తుంది. కానీ ఈ ముద్దుగుమ్మ మాత్రం దాన్ని కాద‌నుకుని సంచలనానికి తెరలేపింది. నిజానికి తెలుగులో సాయిప‌ల్ల‌వికి కావాల్సినంత క్రేజ్ ఉంది. మొదటి సినిమా ఫిదాతోనే ఈ ముద్దుగుమ్మ‌కు సూప‌ర్ క్రేజ్ వ‌చ్చింది. ఈ ఏడాది అనిల్ రావిపూడి దర్వకత్వంలో మహేష్ బాబు సరిలేరు నీకెవ్వరు చిత్రంతో మన ముందుకు వచ్చిన సంగతి తెలిసిందే. ఈ మూవీలో రష్మిక మందన హీరోయిన్‌ గా నటించింది. సంక్రాంతి కానుకగా విడుదలైన ఈ చిత్రం బాక్సాఫీస్ వద్ద బ్లాక్‌ బస్టర్‌ గా నిలిచింది.

అయితే ఈ సినిమాలో ఫస్ట్ హీరోయిన్‌ గా సాయి పల్లవిని అనుకున్నారట. అమ్మడు ఎందుకో తెలీదుగాని నో చెప్పిందట. ఆ తరువాత ఆఫర్ రష్మికను చేరిందని టాక్. సాయిపల్లవి ఫస్ట్ నుండి కూడా సినిమాలు సెలక్టివ్‌ గా చేసుకుంటూ వెళ్తుంది. ఆమె పాత్ర నిడివి తక్కువగా ఉన్నా.. పాత్రకు ప్రాధాన్యం ఉండాలని అనుకుంటుందట. ఈ కారణంతోనే చాలా సినిమాలు వదులుకున్నట్లు సమాచారం. ఇక సరిలేరు నీకెవ్వరులో హీరోయిన్ పాత్రకు పెద్దగా ప్రాధాన్యత లేదనే.. నో చెప్పినట్లు తెలుస్తుంది. ఇదిలా ఉండగా ప్రస్తుతం సాయి పల్లవి రానా తో విరాట పర్వం.. నాగ చైతన్య సరసన లవ్ స్టోరీలో నటిస్తోంది.. ఆ తర్వాత శర్వానంద్‌తో మరోసారి జోడీ కట్టబోతోందట పింపుల్స్ బ్యూటీ.