రోల్ చిన్నది.. ప్రమోషన్లు పెద్దవి!!

గరుడ వేగ సినిమా ప్రీరిలీజ్ ఫంక్షన్ చూస్తే మాత్రం.. అబ్బో అసలు ఈ సినిమాలో హీరో రాజశేఖరా లేదంటే సన్నీ లియోని నా అనిపిస్తుంది. ఎందుకంటే అమ్మడు ఆ రేంజులో అక్కడ సెంటర్ ఆఫ్‌ ఎటెన్షన్ అయిపోయింది. అయితే ఇక్కడ మనం చూడాల్సిన ఒక విషయం ఏంటంటే.. అసలు ఈ మధ్యన సినిమాలో జస్ట్ చిన్న రోల్ చేసిన భామలు కూడా.. ప్రమోషన్లు మాత్రం పెద్దగా చేస్తున్నారు.

కాజల్ అగర్వాల్ ఒక స్టార్ హీరోయిన్ అయినప్పటికీ.. అమ్మడు మెర్సాల్ సినిమాలో చేసింది ప్రాముఖ్యం లేని ఒక చిన్న పాత్ర. ఓ రెండు పాటలు. అయితే ఆ సినిమాను మాత్రం దాదాపు వారం రోజుల పాటు ప్రమోట్ చేసింది. సరే భారీగా రెమ్యూనరేషన్ తీసుకుంది కాబట్టి అనుకుందాం. అయితే రాజు గారి గది 2 సినిమాలో ఏదో అలా కనిపించి గ్లామర్ ఆరబోసే పాత్రను చేసింది సీరత్ కపూర్. కాని ప్రమోషన్లను మాత్రం వాయించేసింది. రిలీజ్ ముందు వరకు సమంత కంటే ఆమెనే అన్ని ప్రెస్ మీట్లలో హడావుడి చేసింది. అలాగే గరుడవేగ సినిమాలో ఓ చిన్న పాత్రను చేసిన శ్రద్దా దాస్ కూడా ప్రమోట్ చేస్తోంది. ఇక కేవలం ఐటం సాంగ్ చేసిన సన్నిలియోని ఏకంగా సినిమాలో సూపర్ స్టార్ అన్నట్లు హంగామా చేయడం అంటే చూసుకోండి.

కావాలనే నిర్మాతలు చేయిస్తున్నారో లేక ఈ భామలే చేస్తున్నారో తెలియదు కాని.. ఇప్పుడు రోల్ చిన్నదైనా కూడా ప్రమోషన్లు పెద్దగా ఉంటున్నాయి. అసలు ఇవన్నీ ఆ నటీమణులుకు గాని సినిమాకు గాని ఎంతవరకు ఉపయోగపడతాయి అంటే.. ప్చ్.. అలా చెప్పేయకూడదండీ!!