'మళ్ళీ మొదలైంది' చిత్రంలో బోల్డ్ అండ్ స్ట్రాంగ్ రోల్ లో సీనియర్ నటి..!

అక్కినేని హీరో సుమంత్ - నైనా గంగూలీ జంటగా నటిస్తున్న తాజా చిత్రం ''మళ్ళీ మొదలైంది''. ఇటీవలే ఈ చిత్రాన్ని అధికారికంగా ప్రకటించిన మేకర్స్.. ఫస్ట్ లుక్ పోస్టర్ ని కూడా రిలీజ్ చేశారు. హీరోహీరోయిన్లు ఒకరినొక‌రు హత్తుకొని పడుకొని ఉండ‌డం.. ఆ తర్వాత వారిద్ద‌రి మ‌ధ్య దూరం పెరిగినట్లు చూపించి సినిమాపై ఆసక్తిని కలిగించారు. విడాకుల తర్వాత జీవితాన్ని ఈ చిత్రంలో చూపించబోతున్నారని తెలుస్తోంది. తాజాగా ఈ చిత్రంలో సీనియర్ నటి సుహాసిని మ‌ణిర‌త్నం కీలక పాత్ర పోషిస్తున్నట్లు చిత్ర బృందం తెలిపింది.

'మళ్ళీ మొదలైంది' చిత్రంలో స్ఫూర్తిదాయకమైన తల్లి పాత్రలో సుహాసిని నటిస్తున్నారని వెల్లడించారు. ఈ సందర్భంగా సీనియర్ నటి సంబంధించిన ఓ పోస్టర్ ని రిలీజ్ చేశారు. ఇందులో సుజా అనే బిజినెస్ విమెన్ గా కనిపించనున్న సుహాసిని క్యారక్టర్.. స్ట్రాంగ్ అండ్ బోల్డ్ గా ఉంటుందని పేర్కొన్నారు. అంతేకాదు ఆమెది మంచి సెన్సాప్ హ్యూమర్ తో గ్రేస్ ఫుల్ గా ఉండే రోల్ అని తెలిపారు. ఇకపోతే ఈ చిత్రంలో వెన్నెల కిషోర్‌ - మంజుల ఘ‌ట్ట‌మ‌నేని - పోసాని కృష్ణ ముర‌ళి ఇతర కీల‌క పాత్ర‌లు పోషిస్తున్నారు.

కాగా, 'మళ్ళీ మొదలైంది' చిత్రానికి టీజీ కీర్తి కుమార్ దర్శకత్వం వహిస్తున్నారు. రొమాంటిక్ కామెడీ ఎంటర్టైనర్ గా రూపొందుతున్న ఈ చిత్రం తెలుగులో ఇప్పటి వరకు చూడని సరికొత్త కథాంశమని మేకర్స్ చెబుతున్నారు. అనుప్ రూబెన్స్ సంగీతం సమకూరుస్తున్న ఈ చిత్రానికి కృష్ణ చైతన్య పాటలు రాస్తున్నారు. శివ జీఆర్ఎన్ సినిమాటోగ్రఫీ అందిస్తుండగా.. ప్రదీప్ రాఘవ్ ఎడిటింగ్ చేస్తున్నారు. అర్జున్ సురిశెట్టి ఆర్ట్ డైరెక్టర్ గా వ్యవహరిస్తున్నారు. రెడ్ సినిమాస్ చరణ్ తేజ్ సమర్పణలో కె. రాజశేఖర్ రెడ్డి ఈ చిత్రాన్ని నిర్మిస్తున్నారు. ఇప్పటికే షూటింగ్ పూర్తి చేసుకున్న ఈ చిత్రాన్ని త్వరలోనే ప్రేక్షకుల ముందుకు తీసుకురానున్నారు.