అర్జున్‌ రెడ్డికి మైన‌పు విగ్ర‌హం!

అదేంటి.. నిన్న‌టికి నిన్న `అర్జున్‌ రెడ్డి` సినిమాతో వెలుగులోకి వ‌చ్చిన విజ‌య్ దేవ‌ర‌కొండ‌కు మైన‌పు విగ్ర‌హం ఏర్పాటు చేస్తున్నారా? అప్పుడే ఇదెలా సాధ్యం.. అంటారా? అయితే వివ‌రాల్లోకి వెళ్లాల్సిందే...

మ్యాడ‌మ్ తుస్సాడ్స్‌ లో మైన‌పు విగ్ర‌హాల ఆవిష్క‌ర‌ణ అన్న‌ది అంద‌రికీ తెలిసిన వ్యాప‌క‌మే. లండ‌న్‌ - బ్యాంకాక్‌ - దిల్లీ వంటి న‌గ‌రాల్లో ఇప్ప‌టికే మ్యాడ‌మ్ తుస్సాడ్స్ మ్యూజియమ్‌ లు ఉన్నాయి. ప్ర‌పంచ‌వ్యాప్తంగా ప‌లు న‌గ‌రాల్లో ఈ మ్యూజియమ్‌ లు ఏర్పాటు చేసి సందర్శ‌కుల కోసం ప్ర‌ముఖుల మైన‌పు విగ్ర‌హాల్ని వీటిలో ఆవిష్క‌రిస్తున్నారు. అలా ఇప్ప‌టికే తెలుగు స్టార్ హీరో ప్ర‌భాస్ వ్యాక్స్ స్టాట్యూని బ్యాంకాక్‌ - లండ‌న్ వంటి చోట్ల ఆవిష్క‌రించ‌డం విశేషం.

రీసెంటుగానే అతి పిన్న వ‌య‌స్కుడైన బాలీవుడ్ హీరో వ‌రుణ్ ధావ‌న్ మైన‌పు విగ్ర‌హాన్ని ఆవిష్క‌రించేందుకు కొల‌త‌లు తీసుకున్నారు. మొన్న‌టికి మొన్న `ప‌ద్మావ‌తి` ఫేం దీపిక పదుకొనే కొల‌త‌లు తీసుకుని లండ‌న్‌ - దిల్లీలో సేమ్ టు సేమ్ విగ్ర‌హాలు ఏర్పాటు చేయ‌నున్నార‌ని తెలిసింది. దీపిక స్వ‌యంగా ఫేస్‌ బుక్ లైవ్‌ లో వివ‌రాలు అందించింది. తాజాగా బాలీవుడ్ అర్జున్‌ రెడ్డి (తెలుగు మూవీ రీమేక్‌).. షాహిద్ క‌పూర్ మైన‌పు విగ్ర‌హం ఏర్పాటున‌కు స‌న్నాహాలు మొద‌ల‌య్యాయి. ఈపాటికే అత‌డి కొల‌త‌ల్ని మ్యాడ‌మ్ తుస్సాడ్స్ నిర్వాహ‌కులు తీసుకున్నారు. డ‌మ్మీ క‌నుగుడ్డు కొల‌త‌ల్ని తీసుకున్నప్ప‌టి ఫోటోని ఆయ‌న సామాజిక మాధ్య‌మాల్లో పోస్ట్ చేసి వివ‌రాలందించారు. మొత్తానికి బాలీవుడ్ అర్జున్‌ రెడ్డి మైన‌పు విగ్ర‌హం దీపిక విగ్ర‌హం చెంత‌నే చూడ‌బోతున్నామ‌న్న‌మాట‌!