తెలుగు ఆఫర్స్‌ కోసమే బుట్టబొమ్మ చేసిందా?

ఒకప్పుడు బాలీవుడ్‌ లో స్టార్‌ హీరోయిన్‌ గా వెలుగు వెలిగిన ముద్దుగుమ్మ శిల్ప శెట్టి తెలుగు ప్రేక్షకులకు కూడా సుపరిచితమే. ఆమె నటించిన సాహస వీరుడు సాగర కన్య.. అజాద్‌.. భలేవాడివి బాసు చిత్రాలతో మెప్పించింది. 2001లో వచ్చిన భలేవాడివి బాసూ చిత్రం తర్వాత ఈ అమ్మడు మళ్లీ తెలుగు వైపు చూడలేదు. 2007 వరకు బాలీవుడ్‌ లో వరుసగా చిత్రాలు చేసిన శిల్ప శెట్టి కొన్ని కారణాల వల్ల బ్రేక్‌ తీసుకుంది. మళ్లీ 2014 నుండి సినిమాల్లో నటించేందుకు ప్రయత్నిస్తుంది.

రీ ఎంట్రీలో ఈ అమ్మడికి ఆశించిన స్థాయిలో ఆఫర్లు రావడం లేదు. బాలీవుడ్‌ ఆఫర్లు రాకపోవడంతో కనీసం సౌత్‌ లో అయినా ట్రై చేయాలని ఆశపడుతున్నట్లుగా అనిపిస్తుంది. సౌత్‌ ఆడియన్స్‌ మరియు ఫిల్మ్‌ మేకర్స్‌ దృష్టిని ఆకర్షించేందుకు ఈ అమ్మడు చేస్తున్న ప్రయత్నాలు నవ్వు తెప్పిస్తున్నాయి. ఒకప్పుడు ఎంత పారితోషికం ఇచ్చినా కూడా సౌత్‌ లో నటించేందుకు ఆసక్తి చూపించని శిల్ప ఇప్పుడు తెలుగులో నటించేందుకు పడుతున్న తాపత్రయం చూస్తే ఈమె స్థాయి మరీ ఇంత తగ్గిందా అనిపిస్తుంది అంటూ నెటిజన్స్‌ కామెంట్స్‌ చేస్తున్నారు.

తాజాగా సోషల్‌ మీడియాలో ట్రెండ్‌ అవుతున్న బుట్టబొమ్మ పాటకు ఈ అమ్మడు కూడా డాన్స్‌ కట్టింది. తెలుగు పాటకు శిల్ప శెట్టి డాన్స్‌ వేసింది అంటూ మీడియా కోడై కూయడం.. ప్రేక్షకుల్లో చర్చ జరగడం మేకర్స్‌ దృష్టిలో పడటం వల్ల హీరోలకు అమ్మగానో.. అత్తగానో అయినా ఆఫర్లు వస్తాయనేది ఈ అమ్మడి ఆలోచన కావచ్చు అంటూ కొందరు విశ్లేషిస్తున్నారు. ఆమె అనుకున్నట్లుగానే ఆమె వేసిన బుట్టబొమ్మ డాన్స్‌ వైరల్‌ అయ్యింది. మీడియాలో స్పేస్‌ దక్కించుకుంది. మరి ఆఫర్లు ఏమైనా వస్తాయేమో చూడాలి.