పవన్-అనిరుధ్.. తమిళ హీరో ఎగ్జైట్మెంట్

చాలా తక్కువ టైంలో సంగీత దర్శకుడిగా మంచి పేరు సంపాదించాడు తమిళ కుర్రాడు అనిరుధ్. అతను ఇప్పటిదాకా చేసిన ప్రతి సినిమా కూడా మ్యూజికల్ హిట్టే. అదిరిపోయే పాటలు ఇవ్వడమే కాదు.. గూస్ బంప్స్ ఇచ్చే బ్యాగ్రౌండ్ మ్యూజిక్ ఇవ్వడంలోనూ అనిరుధ్ ప్రత్యేకత కనిపిస్తుంది. వీఐపీ.. కత్తి.. వేదాళం లాంటి సినిమాల్లో అతడి ఆర్.ఆర్.కు చాలా ప్రశంసలు దక్కాయి. మాస్ ఫ్యాన్స్ అతడి నేపథ్య సంగీతానికి పిచ్చెక్కిపోతుంటారు.

ఇప్పుడు అనిరుధ్.. మన పవర్ స్టార్ పవన్ కళ్యాణ్ సినిమాకు సంగీతాన్నందించబోతున్నాడు. మరి పవన్ సినిమాకు అతను ఎలాంటి పాటలిస్తాడు.. ఎలాంటి ఆర్.ఆర్ చేస్తాడు అన్న ఆసక్తి జనాల్లో మొదలైంది. ఐతే ఈ విషయంలో మన అభిమానుల కంటే కూడా ఓ ప్రముఖ తమిళ హీరో బాగా ఎగ్జైట్ అయిపోతున్నాడు. ఆ హీరో మరెవరో కాదు.. వరుస హిట్లతో ఊపుమీదున్న శివ కార్తికేయన్. అతను వరుసగా అనిరుధ్ తోనే పని చేస్తున్నాడు. వీళ్లిద్దరి కాంబినేషన్లో వచ్చిన సినిమాలన్నీ మ్యూజికల్ హిట్లే.

పవన్-అనిరుధ్ కాంబినేషన్ గురించి అతను స్పందిస్తూ.. ‘‘పవన్ కళ్యాణ్ అంటే నాకు చాలా ఇష్టం. చెన్నైలో ఆయన సినిమాలు తొలి రెండు మూడు రోజుల్లో చూసేస్తుంటా. గబ్బర్ సింగ్ సినిమా థియేటర్లో చూస్తుంటే వాతావరణం మామూలుగా లేదు. లోపల జనాల్లో ఒకరకమైన ఫైర్ కనిపించింది. ఆ ఉత్సాహం చూసి ఆశ్చర్యపోయా. పవన్ గారి తర్వాతి సినిమాకు అనిరుధ్ మ్యూజిక్ ఇస్తున్నాడంటే నాకు చాలా ఎగ్జైటింగ్ గా అనిపిస్తోంది. పవన్ సార్ ఇంట్రడక్షన్ సీన్ కు అనిరుధ్ తన స్టయిల్లో బీజీఎం ఇస్తే ఎలా ఉంటుందా అని ఉత్కంఠగా ఉంది’’ అని శివ కార్తికేయన్ తెలిపాడు.

Like Us on Facebook : https://www.facebook.com/Tupakidotcom/