గోపీచంద్ పాత్రలో సోనూ సూద్

భారత బ్యాడ్మింటన్ చీఫ్ కోచ్ పుల్లెల గోపీచంద్ మీద త్వరలోనే ఓ సినిమా తెరకెక్కబోతుండటం.. అందులో లీడ్ రోల్ మహేష్ బాబు బావ సుధీర్ బాబు పోషించబోతుండటం తెలిసిన సంగతే. ఐతే అతడి కంటే ముందు మరో నటుడు గోపీచంద్ పాత్ర చేయబోతుండటం విశేషం. ఆ నటుడు మరెవరో కాదు.. ‘అరుంధతి’లో పశుపతిగా అదరగొట్టిన సోనూ సూద్. ఇప్పటికే ఇటు తెలుగులో.. అటు తమిళంలో అనేక చిత్రాల్లో నటించి మెప్పించిన సోనూ సూద్ త్వరలోనే నిర్మాతగా కూడా మారుతున్నాడు. హైదరాబాదీ బ్యాడ్మింటన్ స్టార్ పి.వి.సింధు బయోపిక్‌ ను సోనూనే ప్రొడ్యూస్ చేస్తున్న సంగతి తెలిసిందే. దాదాపు రెండేళ్లుగా అతడి టీం ఈ సినిమా మీద పని చేస్తోంది. త్వరలోనే ఈ చిత్రం సెట్స్ పైకి వెళ్లనుంది.

ఇందులో సింధు పాత్రను ఎవరు చేస్తారన్నది ఇంకా ఖరారవ్వలేదు. కానీ సింధు గురువుగా గోపీచంద్ పాత్రను మాత్రం సోనూనే చేయబోతున్నాడు. ఈ విషయాన్ని స్వయంగా సోనూనే ఒక ఇంటర్వ్యూలో వెల్లడించాడు. పి.వి.సింధు జీవితం గురించి చేపట్టిన పరిశోధనలో స్వయంగా తాను కూడా పాల్గొన్నానని.. ఆమె గురించి ఎన్నో విషయాలు తెలుసుకున్నానని.. ఈ క్రమంలోనే గోపీ లాంటి గొప్ప వ్యక్తి గురించి తెలుసుకునే అవకాశం దక్కిందని.. ఆయన జీవితం తననెంతగానో ఇన్‌ స్పైర్ చేయడంతో ఆ పాత్రను తనే చేయాలని నిర్ణయించుకున్నానని సోనూ చెప్పాడు.

పి.వి.సింధు సినిమా కోసం 24 డ్రాఫ్ట్స్ తయారు చేసినట్లు సోనూ ఇంతకుముందే వెల్లడించిన సంగతి తెలిసిందే. మరి సింధు బయోపిక్ లో గోపీ పాత్రను సోనూ చేస్తుంటే.. ఇందులో.. గోపీ బయోపిక్ లో సింధు పాత్రలో ఎవరు కనిపిస్తారన్నది ఆసక్తికరం. దాదాపుగా ఒకే సారి ఈ గురు శిష్యుల బయోపిక్స్ తెరమీదికి రాబోతుండటం విశేషమే.