టీజర్ టాక్: తప్పేం లేదంటున్న స్పీడున్నోడు

‘‘ఆ స్పీడు కొంచెం తగ్గించుకుంటే నీకే మంచిది’’ అని పెద్దాయన అంటుంటే.. ‘‘అంకుల్.. ఈ వయసులో మీలా స్లోగా ఉంటే తప్పు కానీ.. నాలో స్పీడుగా ఉంటే తప్పు కాదు’’ అంటున్నాడు స్పీడున్న కుర్రాడు బెల్లంకొండ శ్రీనివాస్. ‘స్పీడున్నోడు’ ఫస్ట్ టీజర్లో డైలాగ్ ఇది. బెల్లంకొండ శ్రీనివాస్ పుట్టిన రోజు సందర్భంగా నిన్న ఫస్ట్ లుక్ పోస్టర్లు రిలీజ్ చేసిన భీమనేని శ్రీనివాసరావు ఈ రోజు టీజర్ని ప్రేక్షకుల ముందుకు తెచ్చారు. శ్రీనివాస్ తొలి సినిమా ‘అల్లుడు శీను’ రేంజిలో కాకపోయినా ‘స్పీడున్నోడు’లో కూడా భారీతనం బాగానే కనిపిస్తోంది. ఈ చిత్రానికి నిర్మాత కూడా అయిన భీమనేని బాగానే ఖర్చు పెట్టినట్లున్నాడు. టీజర్లో ఆ భారీతనం కనిపిస్తోంది. పాటల్ని ఫారిన్ లొకేషన్లలో భారీగానే తీసినట్లున్నారు.

‘జాదూగాడు’ ఫేమ్ సోనారిక బడోరియా హీరోయిన్ గా అందంగా కనిపిస్తోంది. శ్రీనివాస్ మరోసారి తన డ్యాన్సింగ్, ఫైటింగ్ టాలెంట్ చూపించే ప్రయత్నం చేసినట్లున్నాడు. తమిళ హిట్ మూవీ ‘సుందర పాండ్యన్’కు రీమేక్ గా వస్తున్న సినిమా ఇది. ఫ్రెండ్షిప్ నేపథ్యంలో సాగుతుంది. ఐతే తమిళ సినిమా అంతా విలేజ్ బ్యాక్ డ్రాప్‌లో సాగితే.. ఇందులో సిటీ నేపథ్యం కనిపిస్తోంది. తమిళ సినిమా కొంచెం సీరియస్ గా సాగుతుంది. తెలుగుకు వచ్చేసరికి ఇంకాస్త ఎంటర్టైనింగ్ గా మార్చినట్లున్నారు. సంక్రాంతికి ‘స్పీడున్నోడు’ ఆడియో రిలీజ్ చేసి.. ఫిబ్రవరి 5న సినిమాను ప్రేక్షకుల ముందుకు తేనున్నారు.
Full View