బ్రూస్ లీ ఫలితం చూశాక!!

సినీ రంగంలో అంతే మరి. అందరూ సక్సెస్ వెంటే పరుగులు తీస్తారు. అలాంటపుడు ఆచితూచి అడుగులు వేయాలి. హిట్లు కొట్టినపుడు ఊరికే మిడిసిపడకూడదు. అలా పడ్డాడు కాబట్టే శ్రీను వైట్లకు ఇప్పుడీ దుస్థితి అంటున్నారు సన్నిహితులు. ఈ గోదావరి బుల్లోడికి కొంచెం ఎటకారం ఎక్కువ, ఇగో కూడా కొంచెం ఎక్కువే అని ఎరిగిన వాళ్లు అంటారు. తనకు గిట్టని వాళ్ల మీద తన సినిమాల ద్వారా వైట్ల సెటైర్లు వేయడం అందరికీ తెలిసిన సంగతే. అందుకే ఇండస్ట్రీలో అతడికి శత్రువులెక్కువైపోయారు. దీంతో వైట్ల ఎప్పుడు ఫ్లాప్ తింటాడా.. దెబ్బ కొట్టేద్దాం అని కాచుక్కూర్చున్నారు చాలామంది. ఆగడు - బ్రూస్ లీ సినిమాలతో అడ్డంగా దొరికేశాడు గురుడు. అదేపనిగా వైట్ల గురించి వ్యతిరేక ప్రచారం జరిగిపోతోందిప్పుడు.

అసలే ఫ్లాపుల్లో ఉంటే ఈ నెగెటివ్ ప్రచారం ఒకటి. దీంతో వైట్లకు ఇప్పుడందరూ ముఖం చాటేస్తున్నారట. వైట్లతో సినిమా చేయడానికి ఇప్పుడు ఏ స్టార్ హీరో కూడా సిద్ధంగా లేడని తెలుస్తోంది. అఖిల్ హీరోగా అరంగేట్రం చేశాక.. రెండోదో, మూడోదో సినిమా వైట్లతో చేయిద్దామని అనుకున్నాడు నాగార్జున. కానీ ‘బ్రూస్ లీ’ ఫలితం చూశాక.. వైట్ల మీద వస్తున్న విమర్శలు, నెగెటివ్ ప్రచారం చూశాక.. అతడికి టాటా చెప్పేసినట్లు సమాచారం. ఒకప్పుడు వైట్లను ఆకాశానికెత్తేసిన మహేష్ ఇప్పుడు పలికే స్థితిలో లేడు. అసలు మహేష్ కు ఖాళీ ఉంటే కదా.. వైట్లతో చేయడానికి. ఎన్టీఆర్ పరిస్థితీ అంతే. మిగతా స్టార్ హీరోలు కూడా ఎవరికి వారు బిజీగా ఉన్నారు. ఖాళీగా ఉన్నవాళ్లు కూడా వైట్లతో నో అనేస్తున్నారు. దీంతో రెండేళ్ల కిందటి వరకు యమ డిమాండ్ మీదున్న వైట్ల ఇప్పుడు ఎటూ పాలుపోని అయోమయ స్థితిలో ఉన్నాడు. ఈ స్థితి నుంచి మళ్లీ ఎలా పుంజుకుంటాడో చూడాలి.