ఎవరు ఖాళీగా ఉన్నారు?

నిన్నటిదాకా చేతినిండా పని ఉండి ఇవ్వాళ చేయడానికి ఒక్క పనీ  మామూలు జనాలకే తోచదు. అలాంటిది నిత్యం హడావుడిగా ఉంటూ.. కాలంతో పరుగులు తీస్తూ... ప్రపంచం ఆ మూల నుంచి ఈ మూల వరకు చుట్టొచ్చేసే బిజీ సినీ జీవులు ఖాళీగా ఉండాలంటే  మరీ కష్టమే.

టాలీవుడ్ లో ఓ స్టార్ హీరో పరిస్థితి ఇప్పుడు ఇదే. ప్రయోగాలంటూ చేసిన సినిమాలు వరసగా ఫ్లాపయ్యాయి. మరో సినిమా చేయడానికి రెడీగా ఉన్నా డైరెక్టర్ సంగతి మాత్రం తేలడం లేదు. టాలీవుడ్ టాలెంటెడ్ డైరెక్టర్లకు.. టాప్ డైరెక్టర్లకు కొరతేమీ లేదు. కానీ ఇక్కడ వచ్చిన చిక్కల్లా ఏంటంటే వాళ్లెవ్వరూ ప్రస్తుతం ఖాళీగా లేరు. అందరూ వేరే హీరోలతో కమిట్ మెంట్లలో బిజీగా ఉండిపోయారు. దీంతో కొత్త సబ్జెక్ట్ చెప్పడానికి..  కథ వినిపించడానికి డైరెక్టర్ లేకుండా పోయాడు.

ఫలానా డైరెక్టర్ తో చేద్దామని.. స్టోరీ డిస్కషన్ కు కూర్చోవాలన్నా ఆరేడు నెలలు వెయిట్ చేయక తప్పని పరిస్థితి. బ్రహ్మాండమైన ఇమేజ్ ఉండి.. చేయడానికి నిర్మాతలు రెడీగా ఉన్న డైరెక్టర్ లేక సినిమా చేయలేకపోవడం అన్నది ఇబ్బందికరమైన విషయమే. తనతో ఓ ఫ్లాప్ సినిమా చేసిన డైరెక్టర్ మాత్రమే కొత్తగా సబ్జెక్ట్ వినిపించడానికి ఉత్సాహంగా ఉన్నాడు. అది ఇష్టం లేక తన దృష్టిలో ఉన్న డైరెక్టర్లలో ఎవరో ఒకరిని ఒప్పించేందుకు ప్రయత్నాలు చేస్తున్నాడని తెలుస్తోంది.