రంగస్థలం-2 కాదు.. రంగస్థలం స్టయిల్లోనే

మొదట్నుంచి అర్బన్ కథలతోనే ప్రయాణం సాగిస్తూ వచ్చాడు దర్శకుడు సుకుమార్. కానీ ‘రంగస్థలం’తో ఒక్కసారిగా రూటు మార్చేశాడు. మంచి పల్లె కథను చక్కగా చూపించి మెప్పించాడు. సుకుమార్ నుంచి ఇలాంటి సినిమా రావడం అందరికీ ఆశ్చర్యం కలిగించిన విషయం. ఈ చిత్రం భారీ విజయం సాధించిన నేపథ్యంలో దానికి సీక్వెల్ కోరుకుంటున్నారు ప్రేక్షకులు. ఈ విషయమై సుకుమార్ ను అడిగితే ఆసక్తికర సమాధానం ఇచ్చాడు.

‘రంగస్థలం’లోని పాత్రల్ని జనాలు బాగా ఓన్ చేసుకున్నారని.. అవి జనాల్లోకి బాగా వెళ్లిపోయాయని.. ఈ నేపథ్యంలో ‘రంగస్థలం’ సీక్వెల్ ఆశించడం తప్పు కాదని అన్నాడు. ఐతే ‘రంగస్థలం’ సీక్వెల్ తీసే ఆలోచన తనకు లేదని సుకుమార్ అన్నాడు. కానీ అదే ఫ్లేవర్లో మరో సినిమా మాత్రం తీయాలన్న ఆలోచన బలంగా ఉందని చెప్పాడు. దానికి ‘రంగస్థలం-2’ అని పేరు పెట్టొచ్చో లేదో కానీ.. అదే సినిమాను కొనసాగించే ఉద్దేశం మాత్రం లేదని చెప్పాడు సుక్కు.

‘రంగస్థలం’ కోసం సుదీర్ఘ కాలం పని చేస్తూ అనేక మందిని కలిశానని.. చాలా సమాచారం సేకరించానని.. పల్లెటూరి సినిమాలు ఇంకో రెండు మూడు తీసేంత స్టఫ్ తన దగ్గర ఉందని సుకుమార్ చెప్పాడు. తన దగ్గరున్న సమాచారంతో సాధ్యమైనంత త్వరగా మరో సినిమా తీయాలని ఉందని.. కాబట్టి తన నుంచి పక్కాగా మరో గ్రామీణ సినిమా వస్తుందని సుకుమార్ స్పష్టం చేశాడు. ఐతే ఆ సినిమాకు ఎవరు కథానాయకుడనే విషయంలో ఇంకా ఏ ఆలోచనా లేదని అన్నాడు.