'పుష్ప సెట్'లో లెక్కలమాస్టర్ పిల్లలతో మాటామంతి..!

టాలీవుడ్ క్రియేటివ్ డైరెక్టర్ సుకుమార్ రంగస్థలం సినిమా తర్వాత విరామం తీసుకొని చాలా జాగ్రత్తగా తెరకెక్కిస్తున్న మూవీ పుష్ప. ఈ సినిమాతోదర్శకుడుగా సుకుమార్.. హీరోగా అల్లు అర్జున్ పాన్ ఇండియా వైడ్ పాపులారిటీ సొంతం చేసుకోనున్నారు. ఈ సినిమా తెలుగుతో దేశవ్యాప్తంగా తమిళ, హిందీ, కన్నడ, మలయాళం భాషలలో విడుదల కాబోతుంది. ప్రస్తుతం శరవేగంగా షూటింగ్ జరుపుకుంటున్న ఈ సినిమా గురించి రోజుకో వార్త సోషల్ మీడియాలో వైరల్ అవుతోంది. ఫ్యాన్స్ కోసం ఇదివరకే విడుదల తేదీని కూడా ప్రకటించాడు లెక్కలమాస్టారు. ఈ సినిమాను చాలా రియలిస్టిక్ గా.. వాస్తవానికి దగ్గరగా సన్నివేశాలు తెరకేక్కిస్తున్నట్లు తెలుస్తుంది. ఇప్పటికే ఈ సినిమా పై అంచనాలు ఓ రేంజిలో నెలకొన్నాయి.

అయితే ఇటీవలే భారీ షెడ్యూల్ ప్రారంభించారు సుక్కు టీమ్. తాజాగా పుష్ప సెట్ లో సుకుమార్ భార్యపిల్లలు కనిపించి సర్ప్రైజ్ చేశారట. పిల్లలు రావడంతో లెక్కల మాస్టర్ నేరేషన్ మొదలు పెట్టాడంటూ సుకుమార్ భార్య తబిత ఫోటోలను సోషల్ మీడియాలో పోస్ట్ చేసింది. పిల్లలు కూడా సుకుమార్ తో కలిసి షూటింగ్ ప్లేస్ లో ముచ్చట్లు పెట్టినట్లు టాక్. ప్రస్తుతం వారి ఫోటోలు సోషల్ మీడియాలో హల్చల్ చేస్తున్నాయి. ఈ సినిమాలో మలయాళ స్టార్ యాక్టర్ ఫాహద్ ఫాజిల్ విలన్ రోల్ ప్లే చేస్తున్నాడు. అడవుల్లో ఎర్రచందనం స్మగ్లింగ్ నేపథ్యంలో తెరకెక్కుతున్న ఈ సినిమాలో అల్లు అర్జున్ లారీడ్రైవర్ పాత్రలో కనిపించనున్నాడు. బన్నీ సరసన రష్మిక మందన హీరోయిన్ గా నటిస్తోంది. ఈ సినిమాను మైత్రి మూవీ మేకర్స్ వారు భారీ బడ్జెట్ తో నిర్మిస్తున్నారు. ఆగష్టు 13న ప్రేక్షకుల ముందుకు రాబోతుంది.