సంక్రాంతికి పందెం కోళ్లు పెరుగుతున్నాయ్‌

సంక్రాంతి పందెం కోళ్లు.. ఈ మాట వింటేనే ఉభ‌య‌గోదారి జిల్లాల్లో చెవులూరేస్తాయి. కోడి పందేలు అంటేనే పిచ్చెక్కిపోతారక్క‌డ‌. కోస్తా అంత‌టా ఈ సంద‌డి క‌నిపిస్తుంది. 2016 సంక్రాంతికి కోడి పందేల కోసం ఇప్ప‌ట్నుంచే మాంచి పందెం కోళ్ల‌ను రెడీ చేస్తున్నారు. రెండు నెల‌ల ముందు నుంచే కోళ్ల‌ను బాగా మేపి బ‌లిష్ఠంగా త‌యారు చేస్తారు. క‌త్తి క‌డితే దూసుకెళ్లి శత్రువు పీక కోసేందుకు ట్రైనింగ్ కూడా ఇస్తున్నారు.

సేమ్ టు సేమ్ పోటీ వాతావ‌ర‌ణం ఈసారి టాలీవుడ్ సినిమాల విష‌యంలోనూ ఉండేట్టే ఉంది. ఇప్ప‌టికే వ‌చ్చే సంక్రాంతికి బ‌రిలో దిగేస్తున్నా అంటూ డిక్టేట‌ర్ బాల‌య్య ప్ర‌క‌టించాడు. 8 జ‌న‌వ‌రి  డిక్టేట‌ర్ రిలీజ్ అంటూ తేదీ ప్ర‌క‌టించేసి సిస‌లైన వార్‌ కి తెర లేపాడు. సేమ్ టైమ్ నేను కూడా రేసులో ఉంటాను అని ఎన్టీఆర్ కూడా అన్నాడు. సుకుమార్ ద‌ర్శ‌క‌త్వంలోని మా నాన్న‌కు ప్రేమ‌తో వ‌చ్చే సంక్రాంతి బ‌రిలోనే పోరుకు సిద్ధ‌మ‌వుతుంద‌ని చెబుతున్నారు. అప్ప‌టికి సినిమా నిర్మాణానంత‌ర ప‌నులు పూర్తి చేసి రిలీజ్ చేయాల‌న్న‌ది సుకుమార్ ప్లాన్‌. అలాగే పోటీలో ఎంద‌రు ఉన్నారు సంక్రాంతి సెల‌వుల్ని క్యాష్ చేసుకునేందుకు కింగ్ నాగార్జున తెలివైన ప్లాన్ వేస్తున్నాడు. సోగ్గాడే చిన్ని నాయ‌నా చిత్రాన్ని వ‌చ్చే సంక్రాంతికి రిలీజ్ చే యాల‌ని కింగ్ ప్లాన్.

ఇంత‌లోనే నేను సైతం అంటూ బ‌రిలోకి దూసుకొచ్చాడు సునీల్‌. అత‌డు న‌టిస్తున్న తాజా చిత్రం కృష్ణాష్ట‌మి సంక్రాంతి బ‌రిలోనే రిలీజ‌వుతుంద‌ని నిర్మాత‌లు చెబుతున్నారు. వాసు వ‌ర్మ ద‌ర్శ‌క‌త్వంలో తెర‌కెక్కుతున్న ఈ చిత్రానికి దిల్‌ రాజు నిర్మాత‌. కాబ‌ట్టి పోటీలో ఏమాత్రం త‌గ్గ‌కుండా పందెం కోడిలా దూసుకొస్తాడ‌న‌డంలో సందేహ‌మే లేదు.