ఎదుటి వాళ్ల ముఖంలో సంతోషం చూడ్డానికి ఎంత దూరమైనా వెళ్తానంటున్నాడు సునీల్. కొత్తగా ఈ స్టేట్ మెంట్ ఏంటనుకుంటున్నారా.. కృష్ణాష్టమి ట్రైలర్ లో మన కమెడియన్ టర్న్ డ్ హీరో చెప్పిన డైలాగండీ ఇది. నిన్న కృష్ణుడి ఫోజులో లుక్ రిలీజ్ చేసిన సునీల్.. ఈ రోజు టీజర్ తో ప్రేక్షకుల ముందుకొచ్చాడు. 42 సెకన్ల టీజర్ కలర్ ఫుల్ గా ఉంది. సునీల్ సినిమాల్లో ఇప్పటిదాకా ఎన్నడూ లేని భారీతనం ఈ సినిమాలో కనిపిస్తోంది. రిచ్ ఫారిన్ లొకేషన్ లు.. ఏరియల్ షాట్లు.. కలర్ ఫుల్ సెట్టింగులు.. అబ్బో వ్యవహారమంతా చాలా భారీగానే ఉంది. సునీల్ రేంజికి మించి ఖర్చు పెట్టినట్లున్నాడు దిల్ రాజు. బహుశా దర్శకుడు వాసు వర్మ కథలో ఉన్న దమ్ము చూసి కావచ్చేమో.
ఇప్పటికే పోస్టర్ లలో సరికొత్త లుక్ తో కనిపించిన సునీల్.. టీజర్ లో సైతం భిన్నంగా కనిపించాడు. పూర్తి స్థాయి స్టైలిష్ మాస్ హీరో లెవెల్ లో కనిపించాడు. యాక్షన్ కి, ఎంటర్ టైన్ మెంట్ కి ఢోకా ఉండదన్న భరోసా కలిపించేలా ఉంది టీజర్. హీరోయిన్లు నిక్కీ గర్లానీ, డింపుల్ చోప్డా లిద్దరూ అందంగా దర్శనమిచ్చారు. వాళ్లతో సునీల్ రొమాన్స్ కూడా బాగానే చేసినట్లుగా కనిపిస్తోంది. చివర్లో తన మాస్ అభిమానుల్ని మెప్పించేలా యాక్షన్ రుచి చూపించాడు సునీల్. మొత్తంగా టీజర్ సినిమా మీద అంచనాలు పెంచేలాగే ఉంది. మిస్టర్ పెళ్లికొడుకు, భీమవరం బుల్లోడు సినిమాలతో గట్టి ఎదురు దెబ్బలు తిని.. దాదాపు ఏడాదిన్నర విరామం తర్వాత ప్రేక్షకుల ముందుకు రాబోతున్న సునీల్ ‘కృష్ణాష్టమి’తో ఏమేరకు ప్రేక్షకుల్ని మెప్పిస్తాడో చూడాలి.