'సర్కారు వారి పాట' ను మళ్ళీ షురూ చేశారు..!

'భరత్ అనే నేను' 'మహర్షి' 'సరిలేరు నీకెవ్వరు' వంటి హ్యాట్రిక్ విజయాలతో దూకుడుమీదన్న సూపర్‌ స్టార్ మహేష్ బాబు.. ప్రస్తుతం ''సర్కారు వారి పాట'' అనే యాక్షన్ ఎంటర్టైనర్ ఎంటర్టైనర్ లో నటిస్తున్న సంగతి తెలిసిందే. 'గీత గోవిందం' ఫేమ్ పరశురామ్ పెట్లా ఈ చిత్రానికి దర్శకత్వం వహిస్తున్నారు. మైత్రీ మూవీ మేకర్స్ - GMB ఎంటర్‌టైన్‌మెంట్ - 14 రీల్స్ ప్లస్ సంస్థలు కలిసి ఈ చిత్రాన్ని నిర్మిస్తున్నాయి. ఈ ప్రాజెక్ట్ అనౌన్స్ చేసినప్పటి నుంచి సినీ వర్గాల్లో సోషల్ మీడియాలో భారీ సౌండింగ్ చేస్తూ వస్తోంది. ఇప్పటికే విడుదలైన ప్రీ లుక్ పోస్టర్ లో మహేష్ బాబు లుక్ అందరి దృష్టిని ఆకర్షించింది. గత కొంతకాలంగా క్లాస్ లుక్ లో కనిపించిన మహేష్.. ఈసారి వింటేజ్ లుక్ లో కనిపించనున్నట్లు తెలుస్తోంది.

'సర్కారు వారి పాట' సినిమాకు సంబంధించిన మొదటి షెడ్యూల్‌ ను దుబాయ్‌ లో పూర్తి చేశారు. తదుపరి షెడ్యూల్ ను హైదరాబాద్ లో ప్రారంభించగా.. కరోనా సెకండ్ వేవ్ వచ్చి బ్రేక్స్ వేసింది. అయితే ఈరోజు సోమవారం హైదరాబాద్‌ లో కొత్త షెడ్యూల్‌ షూటింగ్ తిరిగి ప్రారంభించింది. ఈ షెడ్యూల్‌ లో ప్రధాన తారాగణం పాల్గొనే కొన్ని కీలక సన్నివేశాలను షూట్ చేయనున్నారు. ఈ విషయాన్ని మేకర్స్ వెల్లడిస్తూ.. మహేష్ తో పరశురామ్ ఏదో డిస్కష్ చేస్తున్నట్లు కనిపించే ఓ ఫోటోని వదిలారు. ఈ చిత్రంలో సూపర్ స్టార్ సరసన 'మహానటి' కీర్తి సురేష్ హీరోయిన్ గా నటిస్తోంది. ప్రకాష్ రాజ్ - సుబ్బరాజు - రావు రమేష్ - వెన్నెల కిషోర్ తదితరులు కీలక పాత్రలు పోషిస్తున్నారు.

గత రెండేళ్లుగా వరుసగా చార్ట్‌ బస్టర్ ఆల్బమ్స్ అందిస్తున్న ఎస్.ఎస్.థమన్ 'సర్కారు వారి పాట' చిత్రానికి పాటలు సమకూరుస్తున్నారు. ఆర్.మధి సినిమాటోగ్రఫీ అందిస్తుండగా.. మార్తాండ్ కె వెంకటేష్ ఎడిటింగ్ వర్క్ చేస్తున్నారు. ఏఎస్ ప్రకాష్ ఆర్ట్ డైరెక్టర్ గా వ్యవహరిస్తున్నారు. ఫైట్ మాస్టర్స్ రామ్ - లక్ష్మణ్ యాక్షన్ కొరియోగ్రఫీ చేస్తున్నారు. మహేష్ బాబుతో కలసి నవీన్ యెర్నేని - వై.రవిశంకర్ - రామ్ ఆచంట - గోపిచంద్ ఆచంట ఈ చిత్రాన్ని నిర్మిస్తున్నారు. అన్నీ అనుకున్నట్లు జరిగితే 'సర్కారు వారి పాట' చిత్రాన్ని 2022 సంక్రాంతికి ప్రేక్షకుల ముందుకు తీసుకురానున్నారు.