మరో కొరియన్‌ మూవీతో రాబోతున్న సురేష్‌ ప్రొడక్షన్స్‌

టాలీవుడ్ ప్రముఖ నిర్మాణ సంస్థ సురేష్‌ ప్రొడక్షన్స్‌ ఈమద్య కాలంలో వరుసగా చిన్న సినిమాలను కాన్సెప్ట్‌ బేస్డ్‌ సినిమాలను ప్రేక్షకుల ముందుకు తీసుకు వస్తున్న విషయం తెల్సిందే. ఆమద్య కొరియన్ మూవీ మిస్ గ్రానీని తెలుగులో 'ఓ బేబీ' అంటూ ప్రేక్షకుల ముందుకు తీసుకు వచ్చిన సురేష్‌ బాబు ఈసారి మరో కొరియన్‌ మూవీ రైట్స్ ను దక్కించుకున్నాడు. సూపర్‌ హిట్‌ కొరియన్‌ మూవీ 'లక్‌ కీ' ని రీమేక్ చేయబోతున్నట్లుగా సురేష్‌ ప్రొడక్షన్స్‌ వారు అధికారికంగా ప్రకటించారు. జపనీస్ భాషకు చెందిన కీ ఆఫ్‌ లైఫ్‌ కు ఇది రీమేక్ వర్షన్‌.

లక్‌ కీ సినిమా రీమేక్‌ రైట్స్ ను దక్కించుకున్న సురేష్‌ బాబు గురు ఫిల్మ్స్‌ మరియు ఎస్‌ కే గ్లోబాలెంట్ తో కలిసి నిర్మించబోతున్నారు. ఇప్పటికే ఈ సినిమా రీమేక్ కు సంబంధించిన స్క్రిప్ట్‌ వర్క్‌ ప్రారంభం అయ్యింది. ప్రముఖ దర్శకుడు ఈ సినిమా రీమేక్‌ బాధ్యతలు అందుకోబోతున్నాడు. ఇక ఒక ప్రముఖ నటుడు సైతం ఇప్పటికే ఈ సినిమా కోసం ఓకే చెప్పాడట. ఈ సినిమా ఇండియన్‌ లాంగ్వేజెస్‌ అన్ని రీమేక్ రైట్స్ ను సురేష్‌ ప్రొడక్షన్స్‌ వారు కొనుగోలు చేశారు. కనుక ఒకే సారి అన్ని భాషల్లో రీమేక్‌ చేయబోతున్నారా లేదంటే వేరు వేరు భాషల్లో వేరు వేరుగానే ఈ రీమేక్ చేస్తారా అనేది చూడాలి.