తమన్నా గోల్డెన్ ఛాన్స్ కొట్టేసిందా?

కెరీర్ లో హిట్ల కంటే ఫ్లాపులే ఎక్కువున్న హీరోయిన్ తమన్నా. కానీ అవకాశాలకు మాత్రం ఎప్పుడూ కొదవ ఉండదు మిల్కీ బ్యూటీకి. అందుకు ఆమె టాలెంటు, గ్లామరే కారణం అనడంలో సందేహం లేదు. తక్కువ వయసులోనే మంచి పెర్ఫామర్‌ గా పేరు తెచ్చుకుని పెద్ద పెద్ద అవకాశాలు కొట్టేసింది తమ్మూ. ఇటు తెలుగులో, అటు తమిళంలో కొన్నేళ్లుగా అగ్ర హీరోయిన్లలో ఒకరిగా కొనసాగుతోందామె. రెండు ఇండస్ట్రీల్లోనూ చాలామంది స్టార్ హీరోలతో నటించిన తమన్నాకు ఇప్పుడింకో బంపర్ ఆఫర్ తగిలిందని కోలీవుడ్‌ లో ప్రచారం జరుగుతోంది.

విశ్వనాయకుడు కమల్ హాసన్ సరసన తమన్నా నటించబోతోందన్నది తాజా సమాచారం. కమల్ కొన్నేళ్లుగా హీరోయిన్ల ఎంపికలో చాలా పర్టికులర్‌గా ఉంటున్నాడు. తన పక్కన రెగ్యులర్ హీరోయిన్లకు ఛాన్స్ ఇవ్వట్లేదు. ఒక్క త్రిషకు మాత్రమే ఆ అవకాశం దక్కింది. ఇంతకుముందు ‘మన్నథబాణం’ సినిమాలో నటించిన త్రిష.. ఇప్పుడు ‘చీకటి రాజ్యం’లోనూ కమల్ తో తెరను పంచుకోబోతోంది. ఐతే కమల్ తర్వాతి సినిమాలో తమన్నా కథానాయికగా నటించబోతున్నట్లు సమాచారం.

ప్రస్తుతం ‘చీకటి రాజ్యం’ సినిమాను విడుదల చేసే హడావుడిలో ఉన్న కమల్.. దీని తర్వాత సీనియర్ డైరెక్టర్ మౌళి రాసిన కథతో సినిమా చేయబోతున్నాడు. ‘చీకటి రాజ్యం’ సినిమాతో దర్శకుడిగా మారిన కమల్ శిష్యుడు రాజేశ్ ఎం.సెల్వనే ఈ సినిమాకూ దర్శకత్వం వహిస్తాడట. దీని కోసం తమన్నాను హీరోయిన్ గా ఎంచుకున్నట్లు తెలిసింది. ఐతే త్రిష సీనియర్ కాబట్టి ఓకే కానీ.. తమన్నా కమల్ పక్కన మరీ చిన్నగా కనిపిస్తుందేమో అన్న డౌట్ కొడుతోంది. ఐతే తెరమీద ఏదో ఒక మ్యాజిక్ చేసి జోడీ కుదిరేలా చేసుకోగల దిట్ట కమల్. కాబట్టి కమల్ - తమన్నాల జోడీని చూడ్డానికి రెడీ అయిపోండిక.