ఐపీఎల్ లో చిందేస్తున్న మిల్కీ బ్యూటీ!

ఐపీఎల్ కి మ‌న‌దేశంలోనే కాదు ప్ర‌పంచ‌వ్యాప్తంగా చాలా క్రేజ్ ఉంటుంది. 51 రోజుల పాటు సాగే ఈ క్రీడా సంబరాల ఆరంభ వేడుక‌లు కూడా అదిరిపోయేలా జ‌రుగుతాయి. మొద‌టి రోజు ఆరంభ వేడుక‌ల ఏర్పాట్ల‌కు కొన్ని వంద‌ల కోట్ల రూపాయ‌లు ఖ‌ర్చు చేస్తారు ఐపీఎల్ నిర్వాహ‌కులు. ఈ సారి కూడా ఎప్ప‌టిలాగే అదిరిపోయేలా ఏర్పాట్లు జ‌రుగుతున్నాయి. అయితే మ‌న మిల్కీ బ్యూటీ త‌మ‌న్నా ఐపీఎల్ ఆరంభ వేడుక‌ల్లో చిందేస్తుండ‌డం ఈ సారి విశేషం.

ఐపీఎల్ ఆరంభ వేడుక‌ల్లో క‌త్రినా కైఫ్‌- అమీ జాక్స‌న్‌- హృతిక్ రోష‌న్‌- షాహిద్ క‌పూర్ - యామీ గౌత‌మ్ వంటి బాలీవుడ్‌ స్టార్లు నాట్యం చేసి... ప్రేక్ష‌కుల‌కు క‌నువిందు చేశారు. ఈసారి కూడా బాలీవుడ్ నుంచి హృతిక్ రోష‌న్ - వ‌రుణ్ ధావ‌న్ - జాక్వెలిస్ ఫెర్నాండేజ్ - ప‌ర‌ణితి చోప్రా వంటి స్టార్లు ఐపీఎల్ ఓపెనింగ్ కార్య‌క్ర‌మంలో లైవ్ డ్యాన్స్ ప‌ర్ఫార్మ్ చేయ‌బోతున్నారు. వీరితో పాటు సౌత్ స్టార్ త‌మ‌న్నా భాటియా కూడా చిందేస్తుండ‌డం ఓ ర‌కంగా విశేష‌మే. మొద‌టి ఈ కార్య‌క్ర‌మంలో బాలీవుడ్ యంగ్ స్టార్ హీరో ర‌ణ్ వీర్ సింగ్ కూడా న‌ర్తించాల్సి ఉన్నా... భుజం గాయం కార‌ణంగా ఈ షో నుంచి త‌ప్పుకున్నాడు. అత‌ని స్థానంలోనే హృతిక్ రోష‌న్ వ‌చ్చి చేరాడు.

ప్ర‌భుదేవా- మికా సింగ్ కూడా లైవ్ డ్యాన్స్ ప్ర‌ద‌ర్శ‌న‌లు ఇస్తున్నారు. ఈ ఏడాది ఏప్రిల్ 7న వీవో ఐపీఎల్ కొత్త‌ సీజ‌న్ ప్రారంభం కాబోతున్న విషయం తెలిసిందే. బాహుబ‌లి సినిమాతో దేశ‌వ్యాప్తంగా పాపుల‌రిటీ సంపాదించుకున్న‌ త‌మ‌న్నా- బాలీవుడ్‌లోనూ అవ‌కాశాలు అందుకుంది. ఆ ఫేమ్‌తో ఇప్పుడు ఐపీఎల్ ప్ర‌ద‌ర్శ‌న త‌ర్వాత త‌మ‌న్నాకి మ‌రింత పాపులారిటీ రావ‌డం ప‌క్కా!