అల.. ఈడు మగాడ్రా బుజ్జీ

అల్లు అర్జున్‌.. త్రివిక్రమ్‌ ల కాంబినేషన్‌ లో వచ్చిన 'అల వైకుంఠపురంలో' సినిమాకు సక్సెస్‌ టాక్‌ దక్కింది. ఇప్పటికే ఈ చిత్రంకు భారీ ఓపెనింగ్స్‌ నమోదు అయ్యాయి. సంక్రాంతి విన్నర్‌ అల్లు అర్జున్‌ అంటూ చిత్ర యూనిట్‌ సభ్యులు ప్రకటించేసుకున్నారు. అల వైకుంఠపురంలో సినిమా సూపర్‌ హిట్‌ అంటూ ప్రేక్షకులకు థ్యాంక్స్‌ చెప్పేందుకు చిత్ర యూనిట్‌ సభ్యులు థ్యాంక్స్‌ మీట్‌ ను కూడా ఏర్పాటు చేయడం జరిగింది. ఈ థ్యాంక్స్‌ మీట్‌ లో చిత్ర యూనిట్‌ సభ్యులు అంతా పాల్గొన్నారు. ఈ సందర్బంగా తనికెళ్ల భరణి మాటలు ప్రస్తుతం సోషల్‌ మీడియాలో వైరల్‌ అవుతున్నాయి.

అల్లు అర్జున్‌ 'అల వైకుంఠపురంలో' చేసేందుకు చాలా గ్యాప్‌ తీసుకున్నాడు. ఆ గ్యాప్‌ సమయంలో ఒకసారి మీడియా ముందుకు వచ్చిన బన్నీ ఒక మంచి సినిమాను మీకు ఇచ్చే ఉద్దేశ్యంతో ఈ గ్యాప్‌ తీసుకుంటున్నాను. తప్పకుండా ఒక సూపర్‌ హిట్‌ మూవీతో మీ ముందుకు వస్తానంటూ బన్నీ హామీ ఇచ్చాడు. హామీ ఇచ్చినట్లుగానే అల్లు అర్జున్‌ అల వైకుంఠపురంలో అంటూ వచ్చి అభిమానులకు హిట్‌ ఇచ్చాడు. చెప్పి మరీ బ్లాక్‌ బస్టర్‌ కొట్టాడు.. ఈడు మగాడ్రా బుజ్జీ అంటూ తనికెళ్ల భరణి వ్యాఖ్యలు చేయగానే అక్కడున్న వారు అంతా గట్టిగా కేకలు పెట్టారు.

బన్నీ అదే సమయంలో మైక్‌ అందుకుని ఆ డైలాగ్‌ అంటే నాకు చాలా ఇష్టం అన్నాడు. ఇంత పెద్ద సక్సెస్‌ ఇచ్చినందుకు ప్రతి ఒక్క అభిమానికి మరియు ప్రేక్షకులకు హృదయపూర్వక కృతజ్ఞతలు తెలియజేస్తున్నాను అన్నాడు. ఈ చిత్రంలో అల్లు అర్జున్‌ కు జోడీగా పూజా హెగ్డే హీరోయిన్‌ గా నటించిన విషయం తెల్సిందే. ఈ చిత్రంలోని పాటలు సినిమా విడుదలకు ముందే సక్సెస్‌ అయ్యాయి. థమన్‌ అందించిన పాటలు మరియు బ్యాక్‌ గ్రౌండ్‌ స్కోర్‌ సినిమాకు ప్లస్‌ అయ్యాయి.