వివాదాన్ని భలే వాడావ్ తనీష్

తనీష్.. ఇప్పుడీ యంగ్ హీరో పేరు మార్మోగిపోతోంది. రెండు తెలుగురాష్ట్రాల్లో ప్రముఖంగా వినిపించేస్తున్న పేర్లలో తనీష్ పేరు కూడా ఉంది. డ్రగ్స్ మాఫియాలో నోటీసులు అందుకున్నారంటూ.. మీడియా ప్రచారం చేస్తున్న పేర్లలో తనీష్ పేరు కూడా ఉంది. నోటీసులు అందుకున్నవారంతా నేరస్తులే అన్న తరహాలో మన మీడియా హంగామా చేస్తుండడం.. చాలామందికి నచ్చడం లేదు కానీ.. అనవసరంగా ఇప్పుడీ వివాదంలో తలదూర్చే ఉద్దేశ్యం లేక సైలెంట్ అయిపోతున్నారు.

కానీ ఆ వ్యక్తులు అలా ఊరుకోలేరు కదా.. తమ వాదన వినపించడానికి ప్రయత్నం చేస్తున్నారు. వీరిలో తనీష్ కూడా ఉన్నాడు. అయితే.. ఈ కుర్రాడు మాత్రం ఈ వివాదాన్ని తన సినిమా ప్రచారానికి వాడేస్తుండడం విశేషం. ప్రేమిక అనే సినిమాలో నటిస్తున్నాడు తనీష్. ఇప్పటివరకూ ఈ సినిమా గురించి పెద్దగా ఎవరికీ తెలీదు కానీ.. సరిగ్గా వివాదంలో తన పేరు నానుతున్న సమయంలోనే ఈ మూవీకి సంబంధించి ఓ ప్రెస్ మీట్ పెట్టడమే కాదు.. టీజర్ కూడా వదిలేశాడు. తనీష్.. శ్రుతి యుగై జంటగా నటించిన ఈ సినిమా మాస్ ఎలిమెంట్స్ తో బాగానే రంగరించారు.

కానీ ఇంతలా వివాదంలో నానుతున్న సమయంలో.. దాన్ని సినిమా ప్రచారానికి వాడాలన్న ఐడియా మాత్రం అందరికీ రాదు. వచ్చినా దాన్ని అమలు పెట్టేందుకు చాలానే గట్స్ ఉండాలి. ఇక ఈ డ్రగ్స్ విషయంలో తనకు ఎలాంటి నోటీసులు అందలేదన్న తనీష్.. ప్రస్తుతం తాను ఇంటి బాధ్యతలు చూసుకోవాల్సిన కీలకమైన పొజిషన్ లో ఉన్నానని.. మీడియా చేస్తున్న హంగామా కారణంగా.. తామంతా ఎంతో మానసిక క్షోభ అనుభవిస్తున్నామని చెప్పాడు.